Tetë ndeshje pezullim për Grent Halilin dhe po aq për Emiljano Çelën. Gjobat e zakonshme këtë herë janë shoqëruar edhe me dënime të forta të Komisionit të Etikës e Disiplinës, për javën e 7 të Superiores dhe të 5-ën e Kategorisë së Parë. Disiplina e ka dënuar drejtuesin e Tiranës për sjellje antisportive ndaj zyrtarit të ndeshjes. Për Halilin, kthimi në stadium do jetë pas 4 javësh, sepse gjysma është me kusht për një periudhë 6 mujore. E njëjta situatë edhe për trajnerin e Kastriotit. Çela do të mungojë 4 javë e pastaj mund të kthehet të drejtojë skuadrës, sepse edhe ndaj tij është vendosur dënimi i pjesshëm. Gjoba ndërkohë për cështjen e logove të munguara për Partizanin e Teutën.
Në Kategorinë e Parë e kanë pësuar zyrtarët e Besës Klodian Dervishi e Romeo Bizhdili. Të dy janë dënuar nga Disiplina për tetë javë. Dënim ka patur edhe për zyrtarin e Korabit Shpend Kumbarce, por ndaj tij Disiplina ka aplikuar vetëm 3 javë pezullim.
VENDIMET E KOMISIONIT TË DISIPLINËS DHE ETIKËS SË FSHF
Zyrtari i KF Tirana, Grent Halilin, dënohet për sjellje josportive ndaj zyrtarit të ndeshjes. Në bazë të nenit 48/2/a të KDS, dënohet me 8 (tetë) ndeshje pezullim nga aktiviteti. Në aplikim të nenit 32/2/3 të KDS, vendoset pezullimi i pjesshëm i zbatimit, pas shlyerjes së gjysmës së tij. Periudha e pezullimit me kusht për Halilin, në zbatim të nenit 32/4 të KDS, do të jetë 6 (gjashtë) muaj.
FK Partizani, dënohet për mosrespektim të përsëritur të Rregullores së Veprimtarisë Futbollistike. Të kuqtë nuk kanë vendosur stemën e Abissnet Superiore, në mëngën e djathtë të fanellës së lojës. Në bazë të neneve 63.1, 82.1 të Rregullores së Veprimtarisë Futbollistike dhe nenit 14 të KDS, dënohet me gjobë në masën 50.000 (pesëdhjetë mijë) lekë.
Zyrtari i KS Kastrioti, Emiljano Cela, dënohet për sjellje josportive ndaj zyrtarit të ndeshjes. Në bazë të nenit 48/2/a të KDS, dënohet me 8 (tetë) ndeshje pezullim nga aktiviteti. Në aplikim të nenit 32/2/3 të KDS, vendoset pezullimi i pjesshëm i zbatimit të dënimit pas shlyerjes së gjysmës së tij. Periudha e pezullimit me kusht, në zbatim të nenit 32/4 të KDS, do të jetë 6 (gjashtë) muaj.
KF Teuta dënohet për mosrespektim të përsëritur të Rregullores së Veprimtarisë Futbollistike. Durrsakët nuk kanë vendosur stemën e Abissnet Superiore, në mëngën e djathtë të fanellës së lojës. Në bazë të neneve 63.1, 82.1 të Rregullores së Veprimtarisë Futbollistike dhe nenit 14 të KDS, dënohet me gjobë në masën 50.000 (pesëdhjetë mijë) lekë.
KATEGORIA E PARË
KF Luzi i Vogël 2008 dënohet për sjellje të gabuar të spektatorëve. në bazë të nenit 65/1 dhe 65/3/c të KDS, dënohet me gjobë në masën 50.000 (pesëdhjetë mijë) lekë.
FC Besa dënohet për sjellje të gabuar të spektatorëve, hedhjen e sendeve në terrenin sportiv, duke shkaktuar ndërprerjen e përkohshme të lojës. Në bazë të neneve 65/1, 65/3/a, 65/3/c, dhe 65/4/b të KDS, dënohet me gjobë në masën 50.000 (pesëdhjetë mijë) lekë dhe zhvillimin e 4 (katër) ndeshjeve pa spektatorë. Në zbatim të nenit 116/1/a të KDS, gjoba të aplikohet në masën 50%.
Zyrtari i FC Besa, Klodian Dervishi, dënohet për sjellje josportive ndaj zyrtarit të ndeshjes. Në bazë të nenit 48/2/a të KDS, dënohet me 8 (tetë) ndeshje pezullim nga aktiviteti.
Zyrtari i FC Besa, Romeo Bizhdili, dënohet për sjellje josportive ndaj zyrtarit të ndeshjes. Në bazë të nenit 48/2/a të KDS, dënohet me 8 (tetë) ndeshje pezullim nga aktiviteti.
Zyrtari i KS Korabi, Shpend Kumbarce, dënohet për sjellje josportive ndaj kundërshtarit. Në bazë të nenit 47/2/a të KDS, dënohet me 3 (tre) ndeshje pezullim nga aktiviteti.
FK Terbuni dënohet për sjellje të gabuar të spektatorëve. Në bazë të nenit 65/1 dhe 65/3/c të KDS, dënohet me gjobë në masën 50.000 (pesëdhjetë mijë) lekë.
