Robert Sarver, pronar i Phoenix Suns, ka nxjerrë klubin në shitje. Edhe atë të femrave, Mercury Wnba. Ai e bëri të ditur këtë i detyruar nga skandali që kishte çuar në pezullimin e tij për 12 muaj. Vendim i dekretuar nga komisioneri i NBA, Adam Silver. Sarver ka zotëruar Suns për 17 vjet e dy sezone më parë skuadra e tij luajti në finale, duke humbur ndaj Milwaukee. Sezonin e kaluar ai ekspozoi rekordin më të mirë të NBA në sezonin e rregullt. Sarver u sanksionua pak ditë më parë me skualifikim dhe një gjobë prej 10 milionë dollarësh. Kjo si pasojë e një hetimi të ligës që buronte nga një artikull i ESPN-së. Aty ai akuzohet për racizëm, seksizëm dhe sjellje të papërshtatshme ndaj disa punonjësve.
FJALËT
"Si një njeri me besim besoj te shlyerja dhe falja. Prisja që ndalesa 12-mujore të më jepte kohë për të korrigjuar dhe për të hequr hijen e polemikave të mia personale nga ekipi që unë dhe tifozët tanë e duam aq shumë. Por në klimën e tanishme të pamëshirshme është bërë e qartë, me dhimbje, se kjo nuk është e mundur. Se të gjitha të mirat që mund të bëj ose kam bërë janë në hije nga ato që kam thënë në të kaluarën. Për këto arsye, unë po filloj procesin e shitjes së Suns dhe Mercury. Fjalë për të cilat më vjen keq, që lanë në hije gati dy dekada të organizimit të një marke që ka mbledhur kaq shumë njerëz në Arizona, falë basketbollit për meshkuj dhe femra". Sarver nuk ka marrë asnjë dënim penal, por zemërimi mediatik e ka shpallur fajtor pa apel. E NBA ka bërë gjithçka për ta kthyer faqen përfundimisht.
AKUZAT
Historia akuzuese e Espn daton në nëntor 2021. Hetimi që pasoi, vërtetoi se 60-vjeçari nga Tucson përsëriti fjalën zez*k gjatë viteve të tij si pronar. Dhe e bëri të paktën 5 herë në lidhje me atë që është thënë tashmë nga të tjerët.. Përveç kësaj, Sarver dyshohet se ka bërë komente seksiste, si dhe të papërshtatshme në lidhje me pamjen e disa prej punonjësve të tij. Sjellje që mjaftuan për ta mbajtur Sarverin larg Suns. Ai nuk kishte zgjidhje tjetër. Sponsorët kërcënonin publikisht se nuk do të rinovonin kontratat që skadonin dhe lojtarët më me ndikim, James, Paul dhe Draymond Green, kishin kërkuar hapur largimin. Jahm Najafi, pronar i pakicës i Suns, kishte kërkuar gjithashtu largimin e Sarverit.
PRECEDENTI
Ai është pronari i dytë i NBA i detyruar të largohet nga klubi i tij pasi iu nënshtrua akuzave publike për racizëm. Kjo i kishte ndodhur Donald Sterling, atëherë pronar i Los Angeles Clippers. Në vitin 2014 ai ia kishte kaluar drejtimin Steve Ballmerit, pas një skandali të zhurmshëm. Dolën madje regjistrime telefonike të fjalëve të tij të papërshtatshme, që ishin bërë akuza të pafalshme për etikën e sjelljeve të tij. Tani historia përsëritet.
