Një zëdhënës i kryeministrit kanadez Justin Trudeau reagoi pas publikimit të një videoje të shefit të tij. Aty Trudeau shihej duke kënduar këngën “Bohemian Rhapsody” të grupit Queen në një holl hoteli në Londër. Ngjarja kishte ndodhur 2 ditë përpara funeralit të Mbretëreshës Elizabetë II.
Videoja prej 14 sekondash është parë më shumë se 1.5 milion herë. Trudeau i veshur sportiv duket mbështetur në një piano në hotelin Corinthia. Bashkë me të tjerë ai këndon një prej këngëve më të famshme të grupit rock.
Pamjet fillimisht ndezën debate mbi origjinalitetin e saj. Megjithatë stafi i Trudeau pranoi se videoja ishte e vërtetë.
“Pas darkës të shtunën, [kryeministri] iu bashkua një grupi të vogël anëtarësh të delegacionit kanadez. Ata u mblodhën për të nderuar jetën dhe shërbimin e Madhërisë së Saj”, - tha një zëdhënës i kryeministrit. Ai shtoi se Trudeau kishte "marrë pjesë në aktivitete të ndryshme" për të nderuar Elizabeth II teksa ishte në Londër.
“Të gjithë kënduan me mua për dy orë. Kjo ishte ndjenja. Ishte shumë argëtuese” – tha pianisti i njohur kanadez Gregory Charles.
Video ka shkaktuar zemërim tek britanikët.
“E turpshme! As ia vlen ta përshkruash. Jo. Nuk ka asnjë provë se ai ishte i dehur. Por jo tani. Ai është Kryeministër. Në një vend publik, në prag të funeralit të Mbretëreshës. Kështu sillet ai?” - shkroi në Tëitter Andrew Coyne, një kolumnist i gazetës “Globe and Mail”.
Ndërsa avokati dhe autori Mark Bourrie shkroi se ai donte që të tjerët "të këndonin sa të doni në ditët para funeralit të tij".
Trudeau, i cili mori pjesë në funeralin shtetëror së bashku me anëtarët e delegacionit kanadez tha se Mbretëresha, të cilën e takoi në disa raste, ishte "një nga njerëzit e tij të preferuar në botë". ©LAPSI.al
