Përparim Ademi, autori i vrasjes së dyfishtë në Tiranë, është dënuar me burg përjetë.
Ngjarja ndodhi paraditen e 31 dhjetorit 2020, ku Ademi ekzekutoi me automatik bashkëjetuesen e tij Kristina Bardhi dhe motrën e saj Zhaneta Metani. Ngjarja ndodhi brenda banesës së tyre në zonën e Astrit.
Nga hetimet ka rezultuar se 59-vjeçari nuk pranonte ndarjen nga dy motrat. Me to ai kishte një lidhje jashtë martesore.
Në dosjen e krimit të rëndë, thuhej se autori Përparim Ademi ka marrë peng Zhanetën një ditë para se ta vriste, bashkë me të motrën. Gjithashtu ai e ka kërcënuar që të rikthehej me të. Siç citohet në dosje, Ademi i ka kërkuar Zhanetës që të ndahej nga i dashuri dhe e ka çuar në një hotel. Aty kanë kryer marrëdhënie seksuale.
Dosja
“Më datë 30.12.2020 në mëngjes, ka shkuar poshtë pallatit të Zhanetës. Aty e ka pritur nga ora 06:00 e mëngjesit, kur ajo del për punë. Më pas, ai deklaron se e ka marrë nën kërcënimin e një thike, që kishte me vete. Në ato kushte e ka futur në një makinë tip “Volkswagen Tiguan”. Nga aty e ka çuar në Kërrabë, nga rruga e vjetër e Elbasanit. Atje kanë ndaluar në një vend pranë lapidarit nja 500 metra më lart, dhe kanë biseduar. Ka dashur ta detyrojë të kthehej prapë me të, dhe të shkëputej nga ai person.
Përparimi deklaron se një moment Zhaneta u duk sikur ka pranuar. Më pas, ai i ka thënë të shkonin në një hotel dhe të flisnin aty. Më pas, kanë shkuar në hotel, ku dhe kanë kryer dhe marrëdhënie me dëshirën e saj, pa përdorur dhunë ndaj saj në asnjë moment”, thuhej në dosje.
Më tej, në dosje thuhej se; “Në darkë, kur Përparimi ka qenë në shtëpi e ka marrë në telefon motra Kristina dhe Zhaneta, duke më thënë që kisha kërcënuar, rrahur e përdhunuar Zhanetën. Për këtë arsye, do më bënin denoncim, do më fusnin në burg, etj. Më thanë se duhet ta lija të lirë Zhanetën, që të vazhdonte me atë djalin. Të nesërmen jam zgjuar në mëngjes dhe kam shkuar te puseta e shtëpisë, ku mbaja automatikun që e kisha fshehur që në vitin 1997. Ka qëndruar duke menduar çfarë duhet të bënte dhe në një moment e ka ndarë mendjen, duke i thënë vetes se tradhtia ka vetëm një çmim, vdekjen, dhe e ka bindur veten fort për këtë gjë”.
