Presidenti ukrainas Volodymyr Zelenskyy bëri përsëri thirrje të premten komunitetit global që ta njohë Rusinë si një shtet sponsorizues të terrorizmit pas zbulimit të një varri masiv në Izium, në verilindje të Ukrainës.
Presidenti Zelensky tha se mungesa e një vendimi të tillë do të ishte e barabartë me një “tradhti” ndaj të gjithë atyre që vdiqën në territoret e pushtuara nga Rusia.
Zoti Zelenskyy ka njoftuar se qindra trupa janë gjetur “të torturuar, të qëlluar, të vrarë nga granatimet” në varrezën masive në Izium.
Shtëpia e Bardhë komentoi të dhënat e fundit nga Ukraina për zbulimin e një varreze masive që është gjetur në një zonë të çliruar së fundmi nga pushtimi rus.
Zëdhënësi i Këshillit të Sigurisë Kombëtare, John Kirby tha të premten në Uashington se “raportet që po shohim në përgjithësi flasin për më shumë se 440 varre, ku thuhet se përfshihen civilë. Është e tmerrshme. Është e neveritshme. Dhe fatkeqësisht, është në përputhje me llojin brutalitetit me të cilin forcat ruse kanë ndjekur penalisht këtë luftë kundër Ukrainës dhe popullit ukrainas. Ne do të vazhdojmë të mbështesim në mënyrë aktive përpjekjet për të dokumentuar krimet e luftës dhe mizoritë që forcat ruse kryejnë në Ukrainë dhe për të ndihmuar përpjekjet kombëtare dhe ndërkombëtare për të identifikuar dhe mbajtur rusët përgjegjës”.
Ndërkohë të paktën dy sulme të reja ruse goditën qytetin Kharkiv të premten, ndërsa forcat ukrainase vazhdojnë të mbajnë kontrollin mbi territoret e çliruara nga forcat ruse.
Nuk raportohet për viktima, por të paktën 4 persona kanë mbetur të plagosur, mes tyre 2 fëmijë.
“Fillimisht kishte një flakërimë dhe më pas pati një shpërthim. Unë isha thjesht me fat. Ndoshta dikush ka nevojë për mua në këtë jetë,” tha i mbijetuari i këtyre sulmeve, Oleh Semeniuk, 59 vjeçar.
Semeniuk, i cili ka një motër dhe të afërm të tjerë në Rusi, tha se ai kurrë nuk priste që Rusia të sulmonte dhe të vriste civilët në Ukrainë.
“Nuk e prisnim këtë nga rusët. Ata dukeshin se ishin vëllezër, por ata i bënë të gjitha këto,” tha ai para se të shpërthejë në lot.
Ndërsa lufta për të rimarrë territoret e pushtuara vazhdon, Semeniuk mbetet optimist për të ardhmen: “Ne jemi njerëz të hekurt dhe nuk dorëzohemi kurrë,” tha ai./ VOA
