Paul Pogba do të jetë në Kupën e Botës, pavarësisht nga forma e tij fizike. Në Francë tashmë janë të sigurt, mesfushori do të shkojë në Katar sepse është shumë i rëndësishëm për ekipin dhe për teknikun Deschamps. Nëse ai vërtetë do të shkojë në Katar, do të ishte një tronditje e vërtetë për Juventusin, që i është dashur të bëjë pa ish-mesfushorin e United që nga fillimi i sezonit. Francezi do të kthehej në Torino në fillim të vitit të ardhshëm.
29-vjeçari u operua së fundmi për një dëmtim të gjurit të pësuar në korrik gjatë një prej seancave të para stërvitore me fanellën bardhezi. Pogba fillimisht donte të shmangte operacionin dhe zgjodhi një terapi konservatore 5-javore më të shkurtër, por më të rrezikshme. Pas një muaji, gjuri i tij u testua në stërvitje dhe lojtari ndryshoi mendje. Si pasojë, ai u operua. Një zgjedhje që detyron francezin të ndalojë për 40-60 ditë.
Sipas L’Equipe, francezi mund të kthehet në fushë më 10 nëntor, por jo vetëm kaq. Gazeta sportive franceze raporton se mesfushori mund të shkojë në Katar me kombëtaren. Kupa e Botës, në fakt, duhet të fillojë më 20 nëntor, dhjetë ditë pas rikthimit të pritshëm të Pogba në fushë. Prandaj, me shumë mundësi, shpjegon e përditshmja sportive franceze, trajneri Didier Deschamps do ta përfshijë 29-vjeçarin në skuadrën e tij, pavarësisht formës fizike dhe përgatitjes së tij.
Trajneri ka patur gjithmonë një konsideratë të lartë për Pogba dhe sipas mediave, mesfushori bardhezi gëzon një “status special” brenda skuadrës. Deschamps beson se Pogba është një pjesë e rëndësishme e dinamikës së grupit të tij. Për Juventusin do të ishte një befasi e vërtetë, duke qenë se i është dashur të bëjë pa francezin që nga fillimi i sezonit.
Drejtori i Përgjithshëm i Juventusit, Maurizio Arrivabene, ditët e fundit u përpoq të shpjegonte mendimet e klubit bardhezi: “Nuk dua të shikoj të kaluarën apo të krijoj polemika, edhe sepse vendimet merren së bashku. Megjithatë, ne duhet të shohim përpara dhe të shpresojmë për një rikthim të shpejtë. Flitet për një rikthim në Botëror, shpresoj që ai të kthehet sa më shpejt për të na ndihmuar ne”.
