Johnson & Johnson (J&J) do të ndalojë prodhimin dhe shitjen e pudrës së bebeve me bazë talku në të gjithë botën, duke nisur nga viti i ardhshëm.
Njoftimi vjen më shumë se dy vjet pasi gjiganti i kujdesit shëndetësor ndaloi shitjet e produktit në SHBA.
J&J është përballur me dhjetëra mijëra padi nga gratë që pretendojnë se pluhuri i talkut përmbante azbest dhe u shkaktoi atyre kancer ovarian. Por kompania përsëriti pikëpamjen e saj se dekada kërkime të pavarura tregojnë se produkti është i sigurt për t'u përdorur.
Në deklaratën e fundit marka theksoi edhe njëherë se pudra e saj për fëmijë është e sigurt:
"Pozicioni ynë për sigurinë e talkut tonë kozmetik mbetet i pandryshuar. Ne qëndrojmë fort pas dekadave të analizave të pavarura shkencore nga ekspertë mjekësorë në mbarë botën që konfirmojnë se pudra e bebeve Johnson me bazë talku është e sigurt, nuk përmban azbest dhe nuk shkakton kancer.”
Në vitin 2020, J&J tha se do të ndalonte shitjen e pudrës së bebeve në SHBA dhe Kanada, sepse kërkesa kishte rënë pas asaj që marka e quajti "dezinformim" në lidhje me sigurinë e produktit mes një numri çështjesh ligjore.
Në atë kohë, firma tha se do të vazhdojë ta shesë pudrën në pjesën tjetër të botës.
Një hetim i vitit 2018 nga agjencia e lajmeve Reuters pretendoi se J&J e dinte prej dekadash që azbesti ishte i pranishëm në produktet e saj të talkut. Reuters tha se të dhënat e brendshme të kompanisë, dëshmitë dhe provat e tjera treguan se të paktën nga 1971 deri në fillim të viteve 2000, talku i papërpunuar dhe pluhurat e përfunduar të J&J ndonjëherë rezultuan pozitivë për sasi të vogla azbesti.
Në përgjigje të provave të kontaminimit me azbest të paraqitura në sallat e gjyqit, raporteve të medias dhe ligjvënësve amerikanë, firma i ka mohuar vazhdimisht akuzat.
Në tetor, J&J krijoi një filial, LTL Management, duke ia caktuar atij pretendimet për talk. Më vonë filiali shpalli falimentimin, gjë që ndërpreu paditë në pritje.
Përshtatur nga BBC
