Në një nga kontaket e para që pati me tregtarët e karburanteve në mars të këtij viti, kryeministri Rama i njoftoi se për ta do të niste periudha e larjes së mëkateve.
“Është një mundësi e artë që të shplaheni nga çdo mëkat që është pjesë e jetës edhe të riktheheni fuqishëm pastaj komplet të larë nga mëkatet edhe të vazhdoni pastaj të fitoni” u shpreh Rama, kur prezantoi një regjim të rreptë kontrolli mbi çmimin e karburanteve.
Fillimisht, bordi i uli çmimet, pastaj dalëngadalë i çoi atje ku ishin dhe më vonë nisi të luajë me shifra që nuk i bindeshin lëvizjeve në bursat ndërkombëtare.
Një rast flagrant është mbledhja e fundit që fiksoi të njëjtë çmimin e naftës, ndërkohë që çmimet në bursa kanë shënuar rënie.
Sipas “S&P Global Platts”, treguesi Platss, që është referenca me të cilën punojnë importuesit shqiptarë dhe që merret si bazë nga Bordi i transparencës për llogaritjen e çmimit, ishte në 3 korrik 1,181 dollarë për ton. Ndonëse në rritje të lehtë me një ditë më parë, në raport me fundin e qershorit treguesi është ulur me rreth 100 dollarë për ton, apo me 8.3%.
Ndërsa në tregun vendas, çmimi me pakicë i naftës, i cili që prej fillimit të marsit caktohet nga Bordi i Transparencës ka mbetur në nivelin e 240 lekë për litër, që nga data 8 korrik dhe kjo është konfirmuar edhe në mbledhjen e sotme.
Herën e fundit që nafta ishte në këto nivele në bursat ndërkombëtare, në datën 26 maj, në tregun vendas ishte 230 lekë për litër, ose 10 lekë më pak.
Bordi i Transparencës është akuzuar më parë se më shumë e ka dëmtuar konsumatorin, se sa e ka mbrojtur atë nga vetë Shoqata e Shoqërive të Hidrokarbureve.
“Për shkak të ndërhyrjeve të Bordit, çmimi i naftës në tregun vendas është të paktën 5% më i shtrenjtë sesa do të ishte nëse do të vendosej vetë nga tregu”, u shpreh Shoqata në një prononcim të datës 6 Korrik në media.
Pjesë e bordit janë 5 përfaqësues të kompanive të furnizimit me karburante dhe përfaqësues të qeverisë, më konkretisht Ministrja e Financave, Ministrja e Infrastrukturës dhe Energjisë, Drejtori i Tatimeve, Drejtori i Doganave dhe kryetari i Autoritetit të Konkurrencës.
Çmimet e larta kanë rritur ndjeshëm të hyrat në buxhet.
Ministria e Financave bëri të ditur se të ardhurat për 6 muajt e parë ishin gati 280 miliardë lekë, ose 45 miliardë lekë (370 milionë euro) më shumë se e njëjta periudhë e një viti më parë. Për rrjedhojë sa më i lartë të jetë çmimi i karburanteve, aq më shumë para ka për qeverinë.
Me pak fjalë, koha tregoi se mëkatet që lanë tregtarët, i mori përsipër qeveria. Bashkë me paratë./Lapsi.al
