Udhëheqësit evropianë i kanë dhënë Ukrainës statusin e kandidatit, në një vendim historik që hap derën për anëtarësimin në BE për vendin e shkatërruar nga lufta dhe i jep një goditje Vladimir Putinit. The Guardian shkruan se udhëheqësit e BE-së në takimin në Bruksel miratuan statusin e kandidatit të Ukrainës të enjten mbrëma, gati katër muaj pasi presidenti i vendit, Volodymyr Zelenskiy, nisi ofertën e vendit të tij për t'u bashkuar me bllokun në ditët e para të pushtimit rus. Moldavisë iu dha gjithashtu statusi kandidat.
Kalimi nga aplikanti në kandidat zakonisht zgjat me vite, por BE-ja e ka përshpejtuar në mënyrë dramatike procesin, mes zemërimit mbi brutalitetin e sulmit të paprovokuar rus dhe për të treguar solidaritet me mbrojtësit e Ukrainës. Komisioni javën e kaluar u bëri thirrje udhëheqësve të BE-së që t'i japin Ukrainës statusin e kandidatit.
“Ukraina po kalon ferr për një arsye të thjeshtë: dëshirën e saj për t'u bashkuar me BE-në. Opinioni ynë pranon përparimin e jashtëzakonshëm që demokracia [ukrainase] ka arritur që nga protestat e Maidan të vitit 2014,” tha Von der Leyen.
Sot është mbajtur Samiti BE-Ballkani Perëndimor në Bruksel me pjesmarrjen e 27 vendeve anëtare, 6 liderëve të rajonit si dhe presidentin e Këshillit të BE-së, presidenten e Komisionit Evropian dhe 6 udhëheqësit e Ballkanit Perëndimor. Gjatë Samitit është diskutuar vijimi i integrimit të Shqipërisë dhe Maqedonisë së Veriut ku procesi nuk vijon për shkak të vetos së Bullgarisë. Ndërkohë që pjesë e diskutimeve ka qenë dhe liberalizimi I vizave për Kosovën dhe hapja e negociatave me Bosnje Hercegovinën. Për asnjë nga 6 vendet e rajonit nuk pati përparim në rrugën europiane çka ka sjellë dhe zhgënjime te liderët e tyre pjesmarrës në Samit.
