Kancelari i Gjermanisë, Olaf Scholz, tha se Berlini do t’i dërgojë armë Ukrainës “për aq kohë sa të jetë e nevojshme”, duke riafirmuar angazhimin e tij për të qëndruar në krah të Lituanisë dhe aleatëve të tjerë lindorë. Ai tha se udhëtimi i tij në Kiev javën e kaluar për t’u takuar me presidentin e Ukrainës, Volodymyr Zelensky, bëri të qartë se Ukraina i përket Europës, në një fjalim të mbajtur para shoqatës së industrisë së Gjermanisë.
“Liria ka çmimin e saj. Demokracia ka çmimin e saj. Solidariteti me miqtë dhe partnerët ka çmimin e vet. Dhe ne jemi të përgatitur të paguajmë këtë çmim”, tha Scholz.
Ndërsa më tej tha: "Një gjë është e qartë: ne do të vazhdojmë të mbështesim Ukrainën, edhe me armë, për aq kohë sa Ukraina ka nevojë për mbështetjen tonë".
