Ditën e sotme policia e Tiranës arrestoi një prej autorëve të grabitjes së Postës Shqiptare në Kamëz, ndërsa një tjetër u shpall në kërkim. Personi i arrestuar është 20-vjeçari Algert Kurti ndërsa në kërkim është shpallur 30-vjeçari, Elis Suçi, i dënuar më parë për veprën penale “Vjedhja”. Të dy në bashkëpunim me njëri-tjetrin, të maskuar, grabitën nën kërcënimin e armës dje në mesditë, filialin e postës Shqiptare në Kamzë, ku morën 100 mijë lekë dhe u larguan.
Burime bëjnë me dije se 30-vjeçari ka qëlluar ndaj uniformave blu, rreth një vit më parë, gjatë një tentative për ta arrestuar. Ai ka arritur t’iu shpëtojë efektivëve për herë të dytë, ndërsa vijon të jetë në kërkim për ngjarjen e ndodhur dje në Kamëz, ku së bashku me Kurtin grabitën postën. Policia ka sekuestruar një aparat celular dhe veshje, të cilat autorët dyshohet se i kanë përdorur gjatë kryerjes së krimit.
