Drejtoria e Përgjithshme e Policisë ka nxjerre njoftim se përkundër disa lajmeve të rreme mbi arratisjen e shtetasit Alqi Bllako, ish deputeti ndodhet në Drejtorinë Vendore të Policisë Tiranë që prej mbrëmjes së djeshme.
Sqarojmë se shtetasi Alqi Bllako është vetëdorëzuar konform detyrimit ligjor për zbatimin e masës së sigurisë “Arrest në burg”, lëshuar dje nga Gjykata e Posaçme e Shkallës së Parë për Korrupsionin dhe Krimin e Organizuar.
Deri në orët e vona të natës nuk ka pasur një konfirmim për arrestimin e ish-deputetit të Partisë Socialiste, Alqi Bllako. Menjëherë kanë nisur spekullimet, sipas të cilave Bllako është arratisur jashtë vendit.
Gjatë të gjithë ditës, në media qarkulluan lajme për vetëdorëzimin e tij në polici, por pavarësisht raportimeve sporadike, mungoi një konfirmim zyrtar nga policia për ekzekutimin e urdhër-arrestit të SPAK.
Versioni i arratisjes u fry dhe nga fakti se zyrtarët më të lartë të policisë për disa orë kanë ndërprerë çdo komunikim me gazetarët.
Tymnajën e shtoi më shumë një postim i avokatit të Alqi Bllakos në Instagram, që nxorri foton nga një avion me mesazhin: Përqafime!
