Karrigen e drejtorit të Postës Shqiptare, ish-deputeti Ervin Bushati e ka mbajtur për vetëm gjashtë muaj. Me urdhër të kryeministrit Edi Rama, Bushati është shkarkuar nga ky post. Vendin e tij do ta zërë Anisa Kaltanji, e cila njihet si një ndër më të besuarit e kryebashkiakut Veliaj.
Bushati u emërua në krye të Postës Shqiptare në fund të shtatorit 2021, pasi nuk arriti të zgjidhej deputet në zgjedhjet e 25 prillit 2021. Bushati ishte renditur i treti në listën e Partisë Socialiste për Tiranën por vendin ia zuri Fatmir Xhafaj.
