Mesnatë. Ora 12. "Kryeqyteti Europian i Rinisë" i zhytur në terr. Rrugët e Tiranës nuk ndriçohen. Nga Bulevardi "Dëshmorët e Kombit", Unaza, e deri tek rrugët e lagjeve, nga arteriet e mëdha të qytetit deri tek rrugicat qorre ndodhen në errësirë të plotë.
Të udhëtoje rrugëve të Tiranës mbrëmjen e djeshme do të duhej ose të orientoheshe nëpërmjet reklamava të dyqaneve, ose nëpërmjet dritave të makinave, ose diku me blicin e telefonit. (Shiko videot poshtë)
Sigurisht që kryeqytetasit nuk janë të panjohur me errësirën, por prej vitesh ajo ka qenë episodike. Ndonjë defekt nga përmbytjet, ndonjë transformator i prishur, apo ndërprerje teknike. Por, Tirana gjatë mbrëmjes së djeshme ishte ndryshe.
Terri që përfshiu mbrëmë qytetin nuk vinte si pasojë e ndonjë fatkeqësie natyrore, përkundrazi i komanduar nga Ministria e Infrastrukturës dhe Energjitikës që urdhëroi ndërprerjen e ndriçimit në akset kryesore të vendit, si masë për kursim.
Me të vërtetë kriza botërore ekziston. Me të vërtetë që të lëkundura nga pandemia dhe të goditura fort nga lufta në Ukrainë, tregjet ndërkombëtare nuk janë më njësoj. Por, ndryshe nga vendet europiane, apo edhe ato fqinje, në Shqipëri qeveria me zor u vu në lëvizje. Ajo prodhoi zhgënjim me neglizhencën e saj për të marrë masa me qëllim minimizimin e efekteve të krizës. U desh që rrugët të mbushen për ditë të tëra me qytetarë të revoltuar që qeveria të bënte një hap pas nga kokëfortësia për të mos reaguar, edhe pse një hap minimal.
Kryeministri Rama nuk ka pranuar të ulë TVSH-në për disa produkte ushqimore esenciale, nuk ka pranuar të ulë taksat për naftën, nuk ka pranuar të anulojë ndonjë konçesion sikurse bëri gjatë pandemisë. Po të shtosh këtu edhe akuzat se qeveria ka keqmenaxhuar shit-blerjen e energjisë, nevoja për të aktivizuar makinerinë e propagandës u bë e menjëhershme.
Si xhirot e ministrave nëpër supermarkete një ditë të diele, ashtu edhe ndërprerja e ndriçimit nëpër akset kryesore të vendit dhe në Tiranë, përkundër shqetësimeve të ekspertëve se do të rriteshin aksidentet dhe kriminaliteti, kanë një të përbashkët. Show-in. Qeveria po vepron, ajo po kursen shqiptarët!
Lexo më tej: Paniku i Ramës, nxjerr ministrat nëpër supermarkete e fabrika për propagandë
Lapsi.al vëzhgoi rrugët e Tiranës në mbrëmje. Mesnata rezervonte terr, errësirë dhe ankth. A është ky "Kryeqyteti Europian i Rinisë" ? Pamjet më poshtë flasin vetë. ©LAPSI.AL
Rruga e Dibrës
