Në vijim të deklaratave të mëparshme, kryeministri Edi Rama është shprehur i palëkundur nga vendimi i tij për taksën e naftës. Në një intervistë me gazetaren Nisida Tufa, Rama tha se taksa nuk lëviz edhe sikur në shesh të dalin 45 mijë veta. Kryqeveritari i qëndroi fjalëve të përsëritura më herët se qeveria është bërë mburojë për familjet shqiptare dhe biznesin e vogël.
"Kriza energjitike dhe rritja e çmimeve nuk filloi me luftn, por si rezultat i një inflacioni pas pandemisë. Nuk mundet shteti të caktojë çmimet dhe qeveria as i ul dhe as i ngre. Energjia është një mall që sot për sot ne mund të ndërhyjm dhe e mbajmë me buxhet. Ky konsumator e ka faturën 42 lekë, çmimi real me ditët e fundit është 297 mijë lekë, 7 herë më shumë. Ndërkohë në faturë nuk të vjen ky pasi qeveria paguan pjesën shtesë. 95 mijë bizneseve të vogla u kemi thënë nuk duam taksa, TVSH. Po nga do i marrim ne ato që na nevojiten se borxh nuk do të marrim. Unë u kam kërkuar falje atyre në Kukës për tarifën pasi nuk ishte vendim i diskutuar mirë nga qeveria. Ata kishin të drejtë atje. Studentëve u kemi dëgjuar fjalën. Këtu nuk kemi çfarë diskutojmë edhe sikur 45 mijë të mblidhen nuk lëviz taksa e naftës", tha Rama.
Gjatë intervistës Rama iu rikthye një deklarate të vitit 2013, duke thënë se nafta ka qenë e privatizuar nga pushtetarët dhe se me ardhjen në pushtet të tyre është riparë çdo marrëveshje.
