Pas disfatës së thellë që pësoi në zgjedhjet e pjesshme lokale të 6 marsit, kryetari i Partisë Demokratike Lulzim Basha do të mbledhë në orën 17:00 Kolegjin e Kryetarëve. Mbledhja e thirrur nga kreu i demokratëve vjen pas asaj të një dite më parë me grupin parlamentar. Kjo lëvizje u paralajmërua edhe në takimin e mbrëmjes së djeshme të grupit parlamentar nga Basha, i cili u shpreh se për situatën e krijuar do të mbledhë forumet.
Mbledhja e mbrëmshme e grupit parlamentar u shoqërua me debate të forta pasi shumë deputetë duke përfshirë dhe bashkëpunëtorët më besnikë të Bashës i kërkuan këtij të fundit të mbajë përgjegjësi për humbjen e thellë. Ndërkohë nga ana tjetër, kreu i PD-së, Lulzim Basha e konsideroi 6 marsin si “kurth pas 8 janarit”, duke mos e pranuar humbjen e tij të gjashtë në garat elektorale.
