Efektivi i policisë që vrau 29-vjeçarin Jurgen Duka pas një sherri për radhën në market u vetëdorëzua dje në rajonin e policisë. Ai raportohet se u vetëdorëzua në Komisariatin nr. 2 dhe pas dorëzimit të armës dhe proceduarave të identifikimit i janë vendosur prangat. Efektivi i policisë Arbër Sula, përgjatë dy muajve e gjysmë që ishte në arrati, është fshehur brenda territorit të vendit dhe nuk ka tentuar të largohet jashtë.
Në dhjetor të vitit 2021 Sula, ish-agjent krimesh me detyrë në Dibër, qëlloi me armë zjarri për vdekje 29-vjeçarin Jurgen Duka (Mëziri). Shkak për vrasjen e Dukës u bë sherri mes dy personave se kush do paguante i pari tek kasa. Fillimisht Duka mbeti i plagosur ndërsa ndërroi jetë në spitalin e Traumës në Tiranë pasi plumbi e preku në zemër.
