Deputetja e Partisë Demokratike, Oriola Pampuri tha se Arben Ahmetaj dhe Damian Gjiknuri kanë udhëtuar disa herë jashtë vendit me pronarët e inceneratorëve, Mirel Mërtirin dhe Klodian Zoton të cilët janë në kërkim ndërkombëtar për korrupsion. Në një deklaratë për mediat, Pampuri shprehet se udhëtimet jashtë vendit të pronarëve të inceneratorëve me ish-ministrat e qeverisë, vërtetohen përmes sistemit TIMS. Sipas PD-së, Ahmetaj ka udhëtuar 12 herë jashtë vendit me Zoton dhe Mërtirin gjatë periudhës 2012-2019, ndërsa ish-ministri Gjiknuri ka udhëtuar me dy pronarët e inceneratorëve 6 herë në vitet 2012-2019. Deputetja demokrate deklaron se shqiptarëve i janë vjedhur 430 milionë euro me dijeni të plotë të Ahmetajt, Gjiknurit, Ëngjëll Agaçit, Erion Veliajt dhe Lefter Kokës.
Në fjalën e saj, Pampuri kërkon që Prokuroria e Posaçme Antikorrupsion t’i shkojë deri në fund zbardhjes së aferës korruptive të inceneratorëve dhe të vendosë përpara drejtësisë përgjegjësit.
Ditën e djeshme, sekretari i Përgjithshëm i Partisë Socialiste Damian Gjiknuri pranoi njohjen me Zoton, ndërsa Mërtirin tha se e njeh vetëm si fytyrë. Ai u shpreh se nuk ka marrë asnjë përfitim financiar nga kontratat e bëra me incineratorët
