36-vjeçari Arlen Hasanaj, që u arrestua si autor i dyshuar për vendosjen e lëndës shpërthyese në shtëpinë e presidentit të Federatës Shqiptare të Futbollit Armand Duka, është liruar nga burgu. Gjykata e Apelit Durrës ka ndryshuar masën e sigurisë nga arrest në burg në detyrim paraqitje. Seanca që rezultoi me lirimin e Hasanaj-t është zhvilluar me dyer të mbyllura, por në përfundim mësohet se gjykata ka pranuar provat e grumbulluara nga pala mbrojtëse, e cila ndryshoi masën e sigurisë.
I riu nuk e ka pranuar asnjëherë autorësinë e krimit. Para hetuesve ai është shprehur se nuk ka asnjë lidhje me ngjarjen që ka ndodhur në shtëpinë e Dukës. Hasanaj nuk rezultonte të kishte qenë person me precedentë të mëparshme penale.
