Një ditë pas takimit me kryeministrin Edi Rama në Tiranë, presidenti turk Rexhep Tajip Erdogan ka pritur me ceremoni madhështore homologun serb Aleksandër Vuçiç në Ankara.
Në videon e publikuar nga presidenti Erdogan në rrjetet sociale vihet re parada e forcave ushtarake turke dhe kalorësit me kuaj dhe ushtarët e veshur me uniformën e vjetër osmane.
Me gjithë reshjet e borës ceremonia vijoi normalisht, ku pas himneve Erdogan dhe Vuçiç u drejtuan drejt Presidencës për mbajtjen e takimit.
Kujtojmë që të njëjtën pritje Erdogan e kishte rezervuar një vit më parë për kryeministrin Rama në Turqi. Vuçiç do të zhvillojë sot një vizitë njëditore në Turqi, ku do të marrë pjesë në seancën e tretë të Këshillit të Lartë për Bashkëpunim ndërmjet Republikës së Serbisë dhe Republikës së Turqisë.
Me atë rast do të nënshkruhen disa marrëveshje me rëndësi për përmirësimin e mëtejshëm të bashkëpunimit dypalësh, njoftoi Shërbimi për Bashkëpunim me Median i presidentit serb.
Në mbledhje do të shqyrtohen në të gjitha aspektet marrëdhëniet Turqi-Serbi dhe do të diskutohen hapat që mund të ndërmerren për thellimin dhe zhvillimin e bashkëpunimit dypalësh/Panorama.com
