Ish-kryeministri Sali Berisha ka mbërritur ditën e sotme në selinë e Partisë Demokratike, i shoqëruar nga mbështetësit dhe anëtarët e Komisionit të Përkohshëm të Rithemelimit. Pritet që Berisha dhe Komisioni i Rithemelimit të zhvillojnë një mbledhje në një nga sallat e selisë blu.
“Jemi këtu për të sjellë vullnetin e shumicës së demokratëve shqiptarë. Siç e shihni janë anëtarët e Komisionit të Përkohshëm të PD të zgjedhur në Kuvendin e fundit, të cilët kanë ardhur të vendosen në selinë e demokratëve dhe të diskutojnë për problemet e rëndësishme të të ardhmes. Tani ne po ngjitemi sipër”, tha Berisha.
Më tej, ish-kryeministri Berisha theksoi se “në zyrën e Bashës nuk kemi punë. Sot vijmë këtu për të bërë një mbledhje. Deputeti Basha deri më datën 18 duhet të reflektojë për vendimin e Kuvendit më të jashtëzakonshëm në historinë e kombit”. Ndër të tjera mësohet se kreu i PD, Lulzim Basha po zhvillon një mbledhje në një nga sallat e selisë blu.
