Kryeministri Edi Rama po e shtyn përdite e më shumë diversionin e tij për një koalicion të gjerë PD- PS pas zgjedhjeve.
Ai përsëriti sot nga Kamza se është i gatshëm të bashkëpunojë me kreun e PD-së Lulzim Basha, me kushtin që ky të ndahet nga Berisha dhe Meta.
Kreu i qeverisë tha se është gati të shkojë përtej dasive të 30-vjetëve, por sipas tij përgjigjja refuzuese e Bashës tregon që nuk është lider por udhëndjekësi i Berishës.
“Më thotë ai gazetari: Je gati të bashkëpunosh me Lulzim Bashën? Patjetër, pa diskutim, por me një kusht të ndahet nga Saliu dhe Iliri. Dhe Lulzim Basha përgjigjet, dhe përgjigjja e tij është pohimi i faktit që ai nuk është një lider, ai është udhëndjekësi i Saliut dhe Ilirit.
Unë për Shqipërinë dhe shqiptarët jam gati të shkoj përtej të gjitha dasive të 30 vjetëve. Por që ta bësh këtë duhet të jesh, lider, udhëheqës, të kesh forcën e karakterit.
Në një tjetër postim të mërkurën në Twitter, Rama iu drejtua drejtpërdrejt Bashës.
“Po pse vallë janë më të rëndësishëm për ty Saliu dhe Iliri se sa Shqipëria, Lulëzim?! Shqiptarët duan bashkim, duan që ne të gjithë të punojmë për ta dhe ekonominë e tyre përtej pandemisë, duke e lënë pas politikën e vjetër të sherrit, dasisë, konfliktit deri në absurd! Pse ti jo?” – shkroi Rama.
https://lapsi.al/2021/04/15/andi-bushati-basha-mund-te-bashkepunoje-me-ramen-vetem-jashte-politikes/
Edhe më herët gjatë ditës, Rama u shpreh në favor të bashkëpunimit me Bashën pas zgjedhjeve.
“Pas 25 prillit jam i gatshëm të bashkëpunoj me opozitën, dhe me Bashën, por me një kusht të thjesht që të ndahet nga Meta dhe Berisha. Për të transformuar një jete politike që realisht është kthyer në stres për shqiptarët.
Bashkëpunim ngushtësisht si në vendet që ne duam të arrijmë dhe atyre që ne duam t’i ngjajmë, nuk flas për gjëra konkrete, se ne do kemi shumicën, por sidoqoftë në emër të shumicës unë jam shumë i gatshëm të shkoj përtej politikës së këtyre viteve dhe të angazhohem që politika e ardhshme të jetë 100% të mirëqenies shqiptare, jo te konfliktet dhe idiotësisë”, - tha Rama.
Kësaj deklarate Basha iu përgjigj shkurt dhe prerë në rrjetet sociale.
“Në 25 prill shqiptarët do votojnë numrin 9 për ta larguar Ramën dhe ai nuk do jetë kurrë pjesë e qeverisjes sonë. Koha e tij ka mbaruar. Ne do të sjellim ndryshimin dhe Shqipëria do fitojë” – shkroi Basha në Twitter. ©LAPSI.al
