Me 420 të vdekur nga covid-19, muaji shkurt rezultoi të jetë fatal, me shifrat më të rënda të pandemisë. Pritshmëritë për marsin janë mister, por flitet se ngrohja e motit do të sjellë një ulje të përhapjes së covid.
Parashikimet e të ashtuquajturve “ekspertë” nuk kanë më asnjë vlerë, duke parë keqmenaxhimin e deritanishëm të pandemisë. Nëse krahasojmë masat kufizuese me shifrat e përhapjes së virusit del qartë se Komiteti Teknik i “Ekspertëve” nuk ka arritur ta frenojë përhapjen e virusit me masat gjysmake që mori.
Dështoi me detyrimin për vendosjen e maskës në rrugë në tetor të vitit të kaluar, sepse përhapja e virusit u shtua në mënyrë të ndjeshme në muajt në vashdim. Dështoi edhe me kufizimin e lëvizjes së qytetarëve gjatës natës, sepse sërish virusi u përhap akoma më shumë se më parë.
Në datën 5 janar, kur hyri në fuqi ndalimi i qarkullimit pas orës 22:00 të mbrëmjes, u raportuan 11 të vdekur dhe 660 raste te reja. Pas kufizimit të lëvizjes, shifrat e infeksionit dhe të vdekjeve u rritën sërish.
https://lapsi.al/2021/02/19/analiza-6300-vdekje-me-shume-ne-2020-a-u-fshehen-realisht-shifrat-e-covid/
Komiteti Teknik i Ekspertëve shtoi me dy orë të tjera ndalimin e qarkullimit. Në 11 shkurt, kur hyri në fuqi ndalimi i qarkullimit nga ora 20:00 u raportua për 11 të vdekur dhe 1105 raste të reja.
Në këtë fillim marsi, kur diskutohet një kufizim i mëtejshëm i lëvizjes, numri i të vdekurve është dy herë më shumë, me një mesatare prej 20 humbjesh jete, ndërsa pacientët e shtruar në spitale janë dyfishuar.
Por e kujt është përgjegjesia për keqmenaxhimin e pandemisë?
Kryeministri Rama thotë se përgjegjësia është e ekspertëve. Në disa raste, Rama ka pohuar se vendimet për menaxhimin e pandemisë janë të ekspertëve dhe jo të politikanëve.
E bëri këtë në mars të vitit të kaluar, kur vendi ishte mbyllur në karantinë. Në debatin në RealStory me një prej analistëve, kryeministri shprehej:
“Ne nuk jemi të fushës. Jam shumë i bindur në strategjinë tonë. Nëse ndryshojmë e përcaktojnë ekspertët. Ne kemi ekspertë të kalibrit ndërkombëtar. Deri tani, sa i përket vdekjeve nuk duhet të biem në këtë kurth që të nxjerrim konkluzione pasi janë relative”.
https://lapsi.al/2021/02/11/politike-me-vdekjen-shqiperia-me-numrin-me-te-larte-ne-europe-per-humbjet-e-jetes-gjate-pandemise/
Të njëjtën tezë e përcolli në replikë me deputetin Adriatik Alimadhi, që ankohej për menaxhimin e situatës kur u prek vetë nga Covid.
“I mirëkuptoj fjalët e tij të tepërta në kushtet në të cilat ndodhet, duke iu lutur të ndjekë këshillat e mjekëve e mos mbistresohet për strategjinë e luftës, të cilën e vendosin ekspertët e shkëlqyer që kemi jo ne politikanët!” shprehej Rama.
Ekspertët i përdori edhe kundër presidentit Meta, i cili pati kritika për menaxhimin e situatës në tetor të vitit të kaluar, kur i dërgoi një letër Ministrisë së Shëndetësisë lidhur me situatën e COVID-19. Rama u përgjigj me të njëjtin argument.
“Ekspertët janë ata që vendosin për hapat që duhen ndërmarrë çdo ditë në bazë të strategjisë së vjeshtë-dimrit. Rritja e numrave është brenda parashikimeve dhe ne duhet të shmangim me çdo kusht një mbyllje të re, prandaj secili, ti i pari, duhet të zbatojë rregullat e thjeshta!”, ishte përgjigjia e kryeministrit.
Por sa më shumë kohë kalon, aq më të rënda bëhen pasojat e pandemisë dhe zërat që denoncojnë keqmenaxhimin janë gjithnjë e më të fuqishëm. Mjeku Erion Dasho pak ditë më parë kërkoi procedim penal për Komitetin Teknik dhe nxjerrjen e tyre para drejtësisë për vendimet që kanë çuar në qindra apo mijëra të vdekur, të cilët sot mund të ishin shpëtuar. Në një status në rrjetet sociale, Dasho shkroi:
"Kemi arritur në pikën kur përgjegjësia e atyre që gatuan këtë çorbë nuk mund të jetë vetëm profesionale dhe morale, por edhe ligjore. Vdekshmëria nga COVID-i, e konfirmuar tashmë nga vdekjet shtesë, nuk mund të mbulohet sado që të vonohet publikimi i raportit të INSTAT-it. Vetëm vdekjet nuk fshihen dot. Ato mund t’i manipulosh në një regjistër morgu, por jo në një regjistër të gjendjes civile!Pika e parë e kthesës në menaxhimin e epidemisë në Shqipëri është shkarkimi me ceremoni i drejtuesve politikë dhe teknikë të përgjigjes shqiptare ndaj pandemisë. Ministrja dhe ekipi i saj, të pasuar nga komiteti i të ashtuquajturve “ekspertë” duhet të largohen urgjentisht për t’u lënë vendin politikë-bërësve, menaxherëve dhe ekspertëve të vërtetë"
Por ndërsa zërat për keqmenaxhimin e pandemisë shtohen dita-ditës, një prej anëtarëve të Komitetit Teknik, Tritan Kalo këmbëngul se përgjegjësia për menaxhimin e pandemisë është e qeverisë dhe jo e ekspertëve. Kalo thotë se roli i Komitetit është këshillues dhe jo vendimmarrës, duke shfajësuar veten dhe kolegët për menaxhimin e pandemisë.
"Më 31.01.2020 me një Vendim të Ministres së MShMS, u krijua Komiteti prej 11 Anëtarësh të fushave të ndryshme të Shëndetit Publik të kryesuar nga Zv. Ministria e MShMS, për të debatuar e ndërmarë inisiativa në Mirëmenaxhimin e Pandemisë së Sars-Cov2/Covid-19…Bëhet fjalë për një Komitet KËSHILLIMOR dhe jo VENDIM-MARËS sikundër pothuajse përditë abuzohet nga ekzekutivi dhe opozita…” shkruan Kalo në Facebook.
