Në kulmin e emergjencës së koronavirus, me një numër të madh vdekjesh në harkun e 24 orëve, nga Madridi vjen një denoncim makabër. E ka bërë i biri i Lorenzo Sanz, ish-presidenti i Real Madrid i cili u nda nga jeta në 21 mars për shkak të Covid-19, që gjatë një interviste në programin Salvame të TeleCinco ka zbuluar se trupi i të atit nuk gjendet më e ka lëshuar një apel që të zbardhet kjo cështje, që të mund të organizojë ceremoninë e varrimit.
Lajmin e ka bërë të ditur Gazzetta dello Sport, që shpjegon se idea fillestare ishte ajo për të përdorur krematorin për ish-numrin 1 të Blancos në 24 mars, por pastaj ceremonia u shty për kolapsin e institucioneve funerale madrilene për shkak të numrit të lartë të vdekjeve. Kështu, nga varrezat San Isidoro, ceremonia duhet të bëhej në varrezat Escorial, por sot i biri i Sanz, Lorenzo edhe ai, ka bërë të ditur se trupi i të atit nuk erdhi kurrë e se askush nuk e di ku gjendet.
