Gonzalo Higuain ka vendosur të largohet nga Torino e të kthehet në Argjentinë për të shkuar pranë të ëmës që nuk është mirë me shëndet. Sulmuesi i Juventus, pasi iu nënshtrua gjatë javës kontrolleve mjekësore për të verifikuar gjendjen e tij shëndetësore e rezultoi negativ ndaj tamponit për koronavirus, është larguar nga J-Hotel në Continassa ku ishte në izolim me familjen, për tu kthyer në atdhe për motivin e "bashkimit familjar". Sulmuesi bardhezi ka bërë lëvizjen e tij në akord me shoqërinë (ka lajmëruar fillimisht presidentin Agnelli, e duke qenë se stërvitjet janë të ndaluara, nuk kishte teknikisht nevojë për asnjë autorizim) duke u pajisur me dokumentat që dëshmojnë gjendjen e tij shëndetësore. Nga aeroporti i Caselle, Higuain ka fluturuar me jet privat në Francë, nga aty për në Spanjë për të mbërritur më në fund në Argjentinë.
Lajmi fillimisht u shoqërua nga akuzat për papërgjegjshmëri të argjentinasit dhe akuzat që e bënin fajtor për largim nga karantina. Por faktet janë ndryshe: Higuain, në përfundim të karantinës së tij e me dokumentin që vërteton negativitetin e tij ndaj koronavirus, pasi ka njoftuar drejtuesit e klubit, ka vendosur të udhëtojë tek e ëma, për ti qendruar pranë në një moment delikat. Ekzaktësisht si shokët e tjerë të skuadrës, si Cristiano Ronaldo që ndodhet në Madeira, ai do të kthehet në Torino kur Juventus të nisë përgatitjet.
Si Pipita, janë kthyer tek familjet e tyre edhe Miralem Pjanic e Sami Khedira. Të gjithë janë larguar nga izolimi, pasi kanë rezultuar negativë ndaj koronavirus.
