Vigjilje e tensionuar për Kukësin, për atë që shoqëroi humbjen 3-0 në 90 minutat e para kundër Debrecen e për zërat që nervozuan Ernest Gjoka, që kujtonin precedentin e fundit të teknikut në pankinën e Bluve. Jo ideale, si atmosferë, për të përballuar një kundërshtar të cilit duhet ti shënojë tre gola pa pësuar, por Gjoka këmbëngul se skuadra është e përqendruar në ndeshje, ndërsa e konsideron absurd aludimin për një lëvizje në pankinën kuksiane. "Nuk e kuptoj pse ndodh kështu dhe me sa dëshirë e shohim Kukësin një klub ku situara vlon – tha Gjoka - . Në fakt jemi vëretët të mërzitur për rezultatin e ndeshjes së parë, por nuk ka tension dhe se po mundohemi të bëjmë mirë në kthim. Ajo që është absurde dhe ndodh vetëm në Shqipëri, është se mund të vish në pankinë në qershor dhe në korrik të pyesin a do ikësh”.
Klubi në fakt nuk ka bërë asnjë reagim në lidhje me situatën e krijuar, por duket se pas këtij qendrimi është kërkesa e vetë teknikut për ti injoruar zërat, që sipas Gjokës janë tendenca gazetareske dhe larg të vërtetës. “As unë e as presidenti nuk merremi me të tilla fjalë – deklaroi tekniku - . Ne e kemi të qartë situatën dhe shohim përpara dhe nuk merremi me atë që do të prodhojë lajme të tilla e që natyrisht kur është gazetar i bën edhe bukur”
Kundër Debrecen natyrisht tre golat e pësuar peshojnë, në një ndeshje të luajtur, sidomos në pjesën e parë, më mirë se hungarezët. Për të evituar gabimet e bëra në transfertë, Gjoka i ka kushtuar vëmendje të madhe analizës taktike, përmes videos, duke kërkuar nga lojtarët të vendosin në fushë gjithcka kanë, por duke e bërë me qetësi. Duhet një mrekulli që Kukësi të përmbysë verdiktin e ndeshjes së parë dhe tekniku është koshient për këtë gjë, por kjo nuk do të thotë se Blutë futen në fushë të dorëzuar…
