Parodia e Kolegjit Zgjedhor/ Meta s'ka të drejtë, në 30 qershor ka zgjedhje

Kolegji Zgjedhor i ka dhënë sot formë ligjore manovrës së Rilindjes për të gjetur një shteg për të hedhur poshtë çdekretimin e 30 qershorit nga Ilir Meta. Partia Socialiste, që e kundërshtoi pa e dëgjuar aktin e kreut të shtetit dhe që më pas i vuri në punë në mënyrë antiligjore anëtarët e saj në KQZ për të mos ta përfillur atë, përdori një parti qesharake si ajo e Unitetit Kombëtar, për të nxjerrë pataten nga zjarri me duart e të tjerëve. Ajo u sendërzua me kërkesën e Idajet Beqirit, pranë KQZ-së, për t'u çregjistruar nga zgjedhjet e 30 qershorit. Skema, që Lapsi.al e paralajmëroi sapo u njoh me këtë fakt, qe e qartë (lexo linkun poshte). KQZ-ja, si organ i varur prej Rilindjes, do ta hidhte poshtë kërkesën duke i dhënë kështu partisë së Idajet Beqirit mundësinë që ta atakonte në Kolegjin Zgjedhor dekretin presidencial.

Kulisat/ Tentativa e Ramës për të rrëzuar në Kolegjin Zgjedhor dekretin e presidentit

Dhe kështu ndodhi. Me anulimin e kërkesës së Idajet Beqiri për të çregjistruar Partinë e Unitetit Kombëtar nga zgjedhjet, trupa e gjyqtarëve të Kolegjit Zgjedhor Astrit Kalaja, Ridvan Hado, Tomor Skerli, Artur Malaj dhe Lindita Sinanaj mori përsipër të thotë se dekreti i Metës për anulimin e zgjedhjeve është i paligjshëm dhe për pasojë do të ketë zgjedhje në 30 qershor. “Është një vendim i formës së prerë dhe pa të drejtë ankimimi”, thanë përfaqësuesuit e Beqirit që e “luajtën” këtë lojë. Natyrisht, pas këtij vendimi 5 me 0, shtrohen dy pyetje: Edhe sikur të supozojmë se ky qe vendimi i drejtë, përse socialistët vazhduan fushatën në paligjshmëri të plotë dhe pse KQZ gjithashtu nuk e përfilli deri më tani një dekret presidencial të pashqyrtaur nga asnjë gjykatë? Këto janë simptomat e shtetit monopartiak. Dhe në një shtet të tillë edhe gjykatësit zgjedhorë nuk mund të procedojnë ndryshe. Prandaj nga presidenca erdhi reagimi: “Asnjë surprizë nga skeçi i radhës i orkestruar prej kohësh“. ©Lapsi.al