Bashkëpunimi duket se është kthyer në strategji fituese për të marrë të drejtën e organizimit të një eventi madhështor si Botërori i futbollit. Juglindja aziatike kandidon për të organizuar turneun e vitit 2034. Njoftimi është dhënë në Bangkok nga kryeministri i Tajlandës, Prajuth Shan-oshan, sipas të cilit kjo kandidaturë e shumëfishtë përbëhet nga plot dhjetë vende. Bëhet fjalë, përveç asaj të Tajlandës, edhe për Brunein, Kamboxhian, Singaporin, Filipinet, Indonezinë, Laosin, Malajzinë, Mianmarin dhe Vietnamin.
E gjitha kjo, sipas udhëheqësve të këtyre shteteve, do të ndihmonte këtë pjesë të planetit “për të pasur një integrim më të madh me pjesën tjetër të botës”. Kandidatura nga juglindja aziatike do të ketë në fakt një rival shumë të fortë për t’u mundur, Kinën, që kërkon në mënyrë absolute Botërorin e saj të parë. Do të jetë një kthim në Azi, sipas të gjitha mundësive, pas Botërorit të parë dimëror që do të luhet në Katar më 2022.
Përveç atyre kanë shprehur një interesim për organizimin Australia dhe Zelanda e Re, por dhe Zimbabve, Egjipti dhe Nigeria. Një punë e madhe skuadre është ajo që do ta shohim në veprim për aktivitetin e 2026-ës, kur do të luhet në Shtetet e Bashkuara të Amerikës (10 qytete), Kanada (3) dhe Meksikë (3). Pikërisht në këtë edicion do të jetë për herë të parë shtimi i pjesëmarrësve, që do të kalojnë nga 32, në 48. Mbetet për t’u shënuar se, presidenti i Federatës Botërore të Futbollit (Fifa), Xhani Infantino, nuk e ka përjashtuar ende faktin që ky numër i shtuar mund të jetë që në Botërorin e Katarit.
Pikërisht për Botërorin e 2030-ës nuk mungojnë bashkëpunimet: mes kandidatëve janë në fakt Argjentina, Uruguaj, Paraguaj dhe Kili të gjithë së bashku, ashtu sikurse Rumania, Greqia, Bullgaria dhe Serbia, por edhe Maroku, Algjeria e Tuniza. Në pritje për t’u konfirmuar janë interesimet e Kinës, Britanisë së Madhe, si dhe dyshes Spanjë – Portugali.
