Pas vitit 1990, kur ra edhe komunizmi dhe në Shqipëri u vendos sistemit pluralist, shqiptarët e ndanë në dy ekstreme, Partia Demokratike dhe Partia Socialiste, që ishin edhe patrit kryesore në vend. Kjo ndarje nuk kaloi pa probleme në jetën sociale të shqiptarëve, të cilët kudo ku gjenin mundësinë diskutonin me pasion dhe fanatizëm për politikën.
Por gjatë ditës së djeshmë ishte këngëtarja e njohur shqiptare, Irma Libohova, ajo e cila tregoi një histori, që i ka mbetur në mendje nga ajo periudhë e viteve ’90 dhe ku fenomeni i partive politike ia arriti madje të prishte edhe një dasmë. Këtë rrëfim Irma e ka bërë ndërsa ishte e ftuar në emisionin “Thumb”, ku foli për atë kohë, që e konsideronte të vështirë, por sot ajo mendon se njerëzit kanë reflektuar dhe ngjarje të tilla janë pakësuar:
"Një histori që nuk do ta harroj kurrë ka ndodhur në një qytet të Shqipërisë, ishte dasmë e vajzës. Vajza e bukur si drita, si ylli. Vjen krushqia. Më vjen një pusullë mua: Na këndo një këngë për një figurë politike. I thashë duhet t’i thuash të zotit të dasmës se gjithsesi nuk jemi në dasëm për të bërë politikë. Këtu është qejf s’ka lidhje.
Shkurt krushqit ishin të partisë Demokratike, nusja i kishte përfaqësues të partisë Socialiste. Pasi unë nuk e këndova u hodh një shishe vere në dasmë, u hodh nga tavolina e krushqve në pistë aty. U kuptua menjëherë arsyeja pse, thjesht u prish dasma. Krushqit u ngritën ikën dhe dasma u prish. Flasim për shumë vite përpara. Sot njerëzit janë ndërgjegjësuar", - u shpreh Irma Libohova.
