Kryeministri Edi Rama dhe Presidenti i Republikës Ilir Meta po e ndjekin hap pas hapi protestën e opozitës në qendër të Tiranës. Me komente në rrjetet sociale kreu i shtetit dhe numri “një” i qeverisë po japin mesazhet e tyre për atë që po ndodh. Fillimisht Rama bëri ironi me opozitën duke e quajtur atë “pa zë”.
“Çfarë trishtimi një lider opozite që me zë të ikur i thotë qeverisë "Aman ik!", ndërkohë që ata rrotull tij hedhin zjarr mbi godinën e saj! Uroj që kujt vete ende pas kësaj politike qorre, t'i jetë hapur sonte syri nga zjarri që qeverisë s'ka ç'i bën,po Shqipërisë i bën veç dëm” – shkroi fillimisht Rama.
Kur përplasjet nisën të ashpërsohen shkroi: “Respekt për trupat e Policisë së Shtetit që me profesionalizmin e tyre nderuan uniformën e shtetit përballë një turme të udhëhequr nga dëshpërimi i politikës qorre. Shërim të shpejtë për policët e plagosur dhe ndëshkim për dhunuesit e tyre e për zjarrvënësit e institucioneve”, shkruan Rama.
Nuk ka mbetur pas as Presidenti i Republikës që fillimisht reagoi se ishte “duke ndjekur me shumë shqetësim protestën e opozitës dhe u kërkon të gjithëve të ruajnë qetësinë, të evitojnë aktet e dhunës dhe konfrontimet, që mund të shkaktojnë lëndime në njerëz dhe dëme ndaj institucioneve”.
Më pas Presidenti i Republikës u bëri “sërish thirrje qytetarëve të distancohen nga aktet e dhunshme dhe nga individët, të cilët rrezikojnë policët”.
Por pas arrestimit të dhunshëm të sekretarit organizativ të PD-së, Sahit Dollapi, presidenti “u bëri thirrje sërish të gjithë individëve që të distancohen nga aktet e dhunës dhe Policisë së Shtetit të ruajë qetësinë dhe të evitojë përdorimin e panevojshëm të dhunës ndaj protestuesve” – shkruan kreu i shtetit që e mbyll me një reagim të fortë: "Situata para Drejtorisë së Policisë është absurde. Sahit Dollapi duhet të shoqërohet për në spital për të marrë ndihmën e parë për lëndimet dhe jo të mbahet në polici". ©LAPSI.al
