Flamurtari ka mundur 3-1 Teutën duke korrur kështu fitoren e tretë radhazi në kampionatin elitar të futbollit shqiptar, pas atyre ndaj Kamzës në tavolinë dhe Tiranës javën e kaluar. Një rezultat që flet qartë për superioritetin e skuadrës vlonjate që e dominoi takimin e javës së 28-të të Superligës.
Pa kaluar minuta e parë e ndeshjes, Musta pason për Ribaj që i dha avantazhin Flamurtarit në sekondën e 55'-të. Tentativat e Kale dhe Rrapaj që vijuan, u ndalën nga portieri Hidi. Miqtë nga ana tjetër morën veten, por pa mundur të barazonin shifrat. Në pjesën e dytë, Flamurtari shënon golin e dytë. Ishte Sukaj ai që përfitoi nga një hutim i Hidit, për t'u nisur drejt portës së boshatisur dhe finalizuar.
Reagon trajneri Shkëmbi duke hedhur në fushë Latifi dhe Traore. Ishte pikërisht ky i fundit që ngushtoi diferencën duke dërguar në rrjetë një pasim të bukur të Kallakut, dhe duke shënuar kështu golin e parë dhe të vetëm të Teutës në minutën e 65'-të.
Gjithsesi skuadra e trajnerit Daja ruajti avantazhin, ndërkohë që goli i tretë ka ardhur në minutën e 90'-të. Batha ka vulosur rezultatin duke shndërruar në gol penalltinë e fituar nga Elton Kale. Pas kësaj fitoreje, Flamurtari mori tri pikë të tjera dhe vendin e tretë Teutës e cila numëron 43 pikë, një më pak se vlonjatët.
.
