Futbollisti i famshëm i Tiranës dhe Kombëtares, Ali Mema, është ndarë nga jeta në moshën 76-vjeçare, si pasojë e një dëmundje të rëndë, ndeshjen me të cilën nuk e fitoi dot. Të gjithë e kujtojnë me lëvizjet teknike e elegante në fushë Ali Memën, pinjollin e një dinastie futbolli, që edhe sot është prezent tek Tirana, klubin që e deshi gjithë jetën, me të birin Ardian Mema, tekniku i bardhebluve.
Ali Mema do të mbetet në memorien e sportdashësve shqiptar si një nga mesfushorët më të shkëlqyer të brezit të Tiranës së viteve 60-70, teknik dhe shumë virtuoz, duke u cilësuar si një nga më të mëdhenjtë e brezit të tij. Kurajoz, i palodhur me temperamentin e jashtëzakonshëm që e karakterizonte, ai ishte një impuls i madh për skuadrën, duke ndryshuar jo në pak raste rezultatin e takimit. Çdo ndeshje ka qenë një betejë për Ali Memën, ndonëse 172 cm i gjatë, u ka shënuar të gjitha skuadrave të kohës duke realizuar gola të rrallë, me kokë, nga goditjet standarde, madje nga çdo pozicion.
Luante me të dyja këmbët, por arma e tij e fuqishme ka qenë loja në ajër, sepse ishte zotërues i plotë i qiellit kur kërcente. Ka mbajtur 4-ën dhe 6-ën, por simbol në fanellën e Ali Memës ka qenë nr.5 . Ali Mema ishte ndër mesfushorët më të mëdhenj të historisë së futbollit kombëtar, një talent i rrallë, ai të impononte respekt: asnjëherë polemizues dhe i ashpër me kundërshtarët, madje as problematik me arbitrat.
Të shkëlqyera kanë qenë dhe paraqitjet e tij me ekipin kombëtar ku ka dhënë një kontribut të jashtëzakonshëm. Për shumë vite me radhë Mema ju dedikua trajningut duke qenë në krahun e ish trajnerit të Tiranës Enver Shehu. Një lider autentik për ekipin dhe për shpirtin e garës që injektonte tek të gjithë.
Një jetë me 17 Nëntorin ka luajtur Ali Mema: kampion në 1964-’65, 1965-’66, 1968 dhe 1969-’70, deri në takimin e fundit, në vitin 1972, kur e mbyll karrierën pas 12 vitesh si protagonist. Aliu vjen nga dinastia Mema, një familje që ka nxjerrë futbollistë të shkëlqyer, duke filluar nga vëllezërit e Aliut, Osmani dhe Haxhiu, për të vijuar me nipin Sulejman Mema dhe djalin e tij, Ardian Mema, i cili aktualisht është trajner i Tiranës.
