Qytetarë protestues, veçanërisht simpatizantë të dy partive më të mëdha të opozitës, PD-së dhe LSI-së, janë mbledhur në hyrje të qytetit të Roskovecit duke protestuar me thirrjet: "Rama ik".
Mes tyre dhe policisë ka patur disa përplasje dhe incidente. Në hyrje të qytetit, në shenjë proteste, qytetarët kanë djegur goma.
Policëve, i kanë ardhur në ndihmë dhe efektivë të Gardës së Republikës gjatë përplasjeve me qytetarët. Ata janë munduar të mos i lejojnë protestuesit të shkojnë në takimin e Ramës me banorët e Fierit.
Nga ana tjetër, protestuesit kanë qenë tepër të vendosur për të zhvilluar një protestë paqësore në vendin ku kryeministri po zhvillonte takimin.
Sipas Partisë Demokratike, Rama ka ndryshuar rrugën prej protestës së banorëve.
“Edi Rama nuk shkoi dot në Roskovec sot, pasi qytetarët i bllokuan hyrjen në qytet. Protesta po vazhdon në rrugën që lidh Fierin me Roskovecin me thirrjet “Rama Ik” dhe “E duam Shqiperine si gjithë Europa”. Për shkak te bllokimit të rrugës, Rama ka ndryshuar oraret në axhendën dhe lëvizjet në qarkun e Fierit.”shprehet PD.
Ish-deputetët Enkelejd Alibeaj dhe Kejdi Mehmetaj i janë bashkuar gjithashtu protestës.
Alibeaj është shprehur se qytetarët i janë përgjigjur në këtë menyrë aksioneve të Qeverisë, duke u ndalur edhe tek prishjet e fundit që kanë ndodhur në Roskovec në kuadër të rikonstruksionit të qendrës së qytetit.
https://youtu.be/fYiHP304nUM
https://youtu.be/j3bCTneq0DA
