Ishte në ajër prej javësh, madje shenjat ishin dhënë, por në Kamëz dhuna goditi fort dhe jo në shkallët e stadiumit, por në kuadratin e fushës së lojës, ku agresioni nga ana e disa tifozëve mbi arbitrin e ndeshjes mes Kamzës dhe Lacit, Eldorjan Hamiti, imazhe që kanë njollosur futbollin, kampionatin dhe eksperimentin për të ruajtur rendin pa policinë e shtetit. Regimi i Federatës Shqiptare të Futbollit, ka qenë ai i zakonshmi, duke drejtuar gishtin drejt një fajtori që është gjithkush përvec tyre, duke harruar se janë pikërisht ata që vendosin rregullat e lojës dhe kanë në dorë të bëjnë topin të rrotullohet ose jo.
Institucioni që drejton futbollin ka shigjetuar gjithashtu policinë për moskryerje të detyrës, duke kujtuar nenin që e detyron ta bëjë: “Ruajtja e rendit dhe sigurisë publike në mjediset sportive është detyrë institucionale e organeve të Policisë së Shtetit, detyrë e cila siç u evidentua edhe në ngjarjen e sotme vazhdon të mos kryhet” shkruhet në komunikatë. Sa mirë që nenin FSHF e di, por zotërinj që drejtoni futbollin, cfarë prisni të ndërhyni për të vënë në vijë kampionatin? Tifozët u rrahën që në javën e parë, shkallët e stadiumeve u bënë shesh trazirash, asistentë u goditën, fillimisht nga shkallët e stadiumit, përpara se agresorët të kuptonin se mund të shtyheshin edhe më shumë: të zbrisnin në fushë.
E bënë përpara derbit, një javë më parë dhe sulmuan një zyrtar të klubit, i licensuar në FSHF. Fotografi i Flamurtarit u bë pre e disa personave që pa policinë pranë treguan sa burra ishin, duke sulmuar njeriun që kryente punën e tij. E tani situata u agravua edhe më shumë, duke rrahur një gjyqtar në mes të ditës, vetëm sepse vendimi i tij, i drejtë ose jo, nuk ishte në favor të vendasve që drejtësinë u munduan ta bëjnë si në FAR WEST.
Konferenca e sektretarit të përgjithshëm të FSHF-së Ilir Shulku u paramendua, nga ata që ende besojnë se gjërat mund të funksionojnë si duhet, se do të proklamonte vendimin të ndërpritej kampionati. Por jo, duhet të zhgenjëhen sërisht, ishte vetëm refreni i ditur se duhet rishikuar vendimi për të larguar Policinë nga stadiumet. Goditjet ndodhën, rrahjet gjithashtu…cfarë presim të ndodhë që të marrim vendimin e duhur?
