Barcelona nuk lejon afrimin e kundërshtarëve për titullin kampion, duke fituar një ndeshje delikate, madje rokamboleske në stadiumin “Ramon Sanchez – Pizjuan”, përballë Sevilla. Një protagonist i vetëm ndër katalanasit, pesë herë fituesi i Topit të Artë, Lionel Messi: tre gola dhe një asist, që vendosën sfidën 2-4 dhe i kthyen andaluzianët në viktimën e preferuar të argjentinasit, me 36 gola të realizuar kundër tyre.
Impenjimi i të enjtes në Europa League ndoshta i hoqi fuqi në këmbë Sevilla që edhe pse u gjend dy herë në avantazh, nuk mundi dot të përballonte furinë e kapitenit blaugrana: golit të Navas në minutën e 22-të, iu përgjigj vetë Messi pas katër minutash. Sevilla nuk hoqi dorë, duke rimarrë avantazhin në të 42 me golin e Gabriel Mercados, por numri 10 i Barcelonës barazoi sërisht përpara se ti jepte fund në tre minutat e fundit, me golin e fitores dhe asist për pokerin e fiksuar nga Suarez.
10 pikë për momentin larg Atletico Madrid, që duhet të luajë ende ndeshjen dhe 12 nga Real Madrid, e bëjnë të qetë Valverde se të paktën titullin në La Liga e ka në duart e tij.
