Emocionet e Champions League kalojnë nga Anfield Road në Wanda Metropolitana, por përballja mbetet madhështore. Atletiko Madrid e Juventus luajnë aktin e parë të një beteje, që do të vendoset në Torino. Kampionët e Italisë, këtë herë kanë statusin e një pretendenti të madh, edhe për vetë faktin se për bardhezinjtë luan Cristiano Ronaldo.
Mbreti kthehet në Madrid dhe Simeone duhet të shqetësohet: kundër Colchoneros, në 9 sezone me Real Madrid, Ronaldo ka shënuar 22 gola në 31 ndeshje të luajtura kundër Atletico Madrid: 12 në Liga, 6 në Kupën e Mbretit, 4 në Champions League. Juventus nuk është vetëm CR7, por edhe Atletiko nuk impresionohet nga statistikat. Griezmann e bëri të qartë kur deklaroi se në ndeshjet e mëdha bardhekuqtë japin më të mirën.
Nuk ka staturën e kundërshtarit, por në Gelsenkirschen, Schalke 04 do të mundohet të bëjë të vlejë faktorin fushë, kur përballë të ketë Manchester City. Skuadra e Guardiolës është shumë potente për tu shqetësuar nga kjo sfidë, por tekniku katalanas e ka të qartë se pretendimet, sidomos në Champions, i përkasin vetëm fushës.
