Më keq nuk ka ku të shkojë për Kazmën, e mundur në duelin për mbijetesë dhe me trajnerin Ernest Gjoka, që ka dhënë dorëheqjen, pas një humbje in-extremis, në një ndeshje që për pjesën dërrmuese foli për skuadrën e tij. Në qiellin e shtatë Bledar Devolli, hakmarrje kundër ish-skuadrës dhe një ecuri fantastike me tre fitore në katër ndeshjet e fundit, gjë që e ka vënë nën presion tashmë Luftëtarin.
Ishte në fakt ndeshja për të mos u humbur, me dy skuadra me pikë të barabarta, që kishin trenin e fundit, për të vazhduar të besonin tek shpëtimi, por Kamza e thelloi krizën e saj duke vendosur fatet e një sezoni në një ndeshje të vetme.
E njihte mirë Devolli Kamzën dhe e shfrytëzoi duke u imponuar në mesin e fushës dhe duke bllokuar, të paktën në pjesën e parë, cdo top të parë drejt Plakut e Martinenës. Kamza mund të dilte fituese vetëm nga episodet, sepse lojën e kontrolluan miqtë, por edhe në mundësinë që iu paraqit Plaku nuk bëri atë që pritej prej tij. Pasimi i Malajt në të 73′ ishte shansi për të ndryshuar fatet e lojës, por atë që nuk e bëri Plaku, e bëri Ymeraj në minutën e dytë shtesë. Goditja e fuqishme e mesfushorit nuk i la asnjë mundësi Avdylit dhe në entuziazmin e papërmbajtshëm të krutanëve, Ymeraj është i vetmi që nuk festoi në shenjë respekti për ish-skuadrën.
Për Kamzën fatet duken të vendosura, tani edhe pa trajnerin e tretë të sezonit. 19 pikë për Kastriotin, që me këtë rezultat vazhdon të ëndërrojë shpëtimin, duke paralajmëruar kundërshtarët direktë se nuk do të heqë dorë deri në fund
