Skandali i përfshirjes së një zyrtari lokal të policisë në Malësinë e Madhe në rast shantazhi seksual ndaj 15-vjeçareje ka zbuluar një tjetër aferë më të rëndë të mënyrës se si janë kryer rekrutimet në radhët e uniformave blu. Berhan Bajrakurti, specialist i policimit në Komunitet në Gruemirë, në Komisariatin e Policisë së Malësisë së Madhe, u arrestua një orë pas denoncimit që nëna e vajzës bëri në media, duke publikuar edhe video teksa inspektori i zonës i tregonte organin gjenital së bijës në video telefonata. Vajza 15-vjeçare e ka filmuar këtë moment, duke e paraqitur si një provë të fortë në polici, ku bëri edhe kallëzimin. Në denoncim ato thonë se kanë marrë edhe kërcënime prej inspektorit, i cili u vu në dijeni për denoncimin.
"Do ju zhduk, do ju shfaros", - ishin fjalët kërcënuese të tij, të cilat nëna ka guxuar t'i bëjë publike në media duke mos pasur ngurrimin edhe të publikojë videon me gjeste të turpshme nga ana e inspektorit të policisë Berahan Bajrakurti.
Në 2008-ën, Bajrakurti është shkarkuar nga radhët e policisë për shkelje të rënda në detyrë. Gjatë kësaj periudhe, Bajrakurti ka punuar si fatorino në linjën e autobusit Shkodër - Koplik. Rreth vitit 2015 ai është rikthyer në detyrë. Burime të lapsi.al në Shkodër thonë se ai është angazhuar në zgjedhjet lokale të 21 qershorit 2015 si komisioner i Partisë Socialiste në Malësinë e Madhe. Të njëjtat burime thonë se në vjeshtën e atij viti, Bajrakurti ka veshur sërish uniformën e policit. Inspektori i Policisë është i martuar, baba i 3 fëmijëve, dy vajzave dhe një djali.
Skandalin e rikthimit të policit në detyrë e përmendi edhe kreu i PD-së Basha gjatë takimeve në Lushnje. Ministri i Brendshëm reagoi duke u distancuar, madje duke mohuar edhe veten. Edhe pse në emisionin “Opinion” kur pritej të merrte detyrën e ministrit, Lleshaj tha se “fytyra e çdo polici do të ishte edhe fytyra e tij”, sot ai thotë se “policët janë të Shqipërisë dhe se secili tregon veten e tij me veprimet që bën”. ©LAPSI.al
