Një anketim i fundit i kryer nga INSTAT dhe Instituti i Shëndetit Publik thotë se gati 70% e shqiptareve kanë përjetuar depresionin në jetën e tyre. Por mjekët psikiatër shprehen me rezerva për rezultatin duke u shprehur se duhen dalluar sëmundjet e lehta mendore si ankthi nga sëmundjet madhore siç është depresioni.
Si mjeke në një prej Qendrave më të mëdha të shëndetit mendor në kryeqytet, psikiatrja flet për rritjen e numrin të njerëzve që vuajnë nga çrregullime mendore.
“Nëse para 6 viteve numri i personave që merrnin shërbime te ne ishte 4000-5000, tani është 9000-10.000 persona”, thotë ajo.
Qytetarët e pyetur për rezultatet përmendin krizën social-ekonomike si shkaktar të çrregullimeve mendore.
“Është e ekzagjeruar 70% me depresion, mërzitje e ankth po, edhe mund të jetë. Mendoj se 70% është shumë e lartë se na bën të gjithëve me probleme atëherë”, shprehen disa qytetarë.
