Pasi skeleti i 48-vjeçarit Astrit Lamaj u gjet në një vilë luksoze në Milano, të afërm të tij tregojnë se prej 5 vitesh ai kishte humbur kontaktet me familjen.
Në fillim të 2013, Lamaj ishte deklaruar i zhdukur në Xhenoa, vend në të cilin edhe jetonte.
Ai ishte banor i fshatit “Tre Vllazër” në Novoselë.
6 vite më parë, Astrit Lamaj ishte larguar për një jetë më të mirë në Itali. Pasi humbi kontaktet me familjen, asgjë nuk u dëgjua më për të deri në momentin e ekspertizës Mjeko-ligjore në Itali, e cila përcaktoi se skeleti i gjetur në murin e një vile i përkiste emigrantit shqiptar.
Ngjarja ka tronditur të gjithë fshatin Tre Vllazër, që ndodhet jo më larg se 20 km nga qyteti i Vlorës.
Nelo Meminaj, një nga të afërmit e 48-vjeçarit, shprehet se askush nuk e mendonte se fati i Astrit Lamajt do të ishte i tillë, duke treguar qartë tronditjen. Ai tregon se Astriti ishte një djalë i qetë dhe askush nuk e besonte se do të përfundonte në mënyrë kaq tragjike jeta e tij. Pas identifikimit, tashmë pritet që të kryhen procedurat përkatëse për kthimin e trupit të 48-vjeçarit pranë familjarëve.
Kur është larguar Astrit Lamaj nga Shqipëria dhe fshati?
Rreth 6 vite më parë është larguar për çështje ekonomie në Itali. Më ka marrë mua 250 mijë lekë dhe tha se Shqipëria nuk bëhet dhe iku në emigrim.
Kur i ka humbur kontaktet me të afërmit dhe familjen e tij?
Rreth një vit pasi është larguar nga fshati, humbi çdo lloj kontakti me familjen. Ndërsa tani, prej pesë vitesh familja e kërkonte, por askush nuk mendonte në një fund të tillë tragjik të tij. Astriti ishte djalë i mrekullueshëm.
Si e morët vesh lajmin?
Nga mediat italiane dhe gjithçka konfirmon se është ai. Askush këtu në fshat nuk e beson diçka të tillë. Unë e kam edhe si nip, se kështu i thërrisja dhe ishte djalë i mrekullueshëm. Jemi të tronditur nga kjo gjendje.
Si e priti lajmin familja e tij?
Ka hapur dyert e mortit. Priten vizitat atje dhe është familje e mrekullueshme. Trupi nuk dihet se kur vjen sepse do bëhen ato ekspertizat, ato gjërat. Ne jemi totalisht të shqetësuar për këtë fakt. Kjo është tragjedia e katërt që ka prekur këtë familje. Që nga i ati që i ra infarkt, i vëllai u përmbys me zetor dhe ndërroi jetë kur ishte vetëm 18 vjeç dhe e motra u përfshi në një aksident te mbikalimi i Panajasë, ku mbeti e vdekur. Kjo është tragjedia tjetër që prek këtë familje./ Panorama
