Me akuzën e “Vrasjes së punonjësve të Policisë së Shtetit”, mbetur në tentativë, do të përballen 3 të dyshuarit për përplasjen me Policinë në Elbasan rreth 2 vite më parë.
Konkretisht, Prokuroria kërkon të marrë si të pandehur Suel Çelën, Enea Bekteshin dhe Kelmend Xhaferrajn, ndërsa tashmë pritet që të zhvillohet seanca paraprake me gjyqtar Klodian Kurushin.
Kujtojmë se dosja në fjalë ka kaluar herë në Prokurorinë e Elbasanit dhe herë në atë të Krimeve të Rënda, ku edhe u mbyllën hetimet. Në 19 shtator 2017, Prokuroria e Elbasanit nisi hetimet dhe pasi administroi edhe pamjet filmike në tregun ushqimor, e kaloi dosjen te Krimet e Rënda.
Në fund të vitit 2017, Prokuroria e Krimeve të Rënda vendosi të shpallë moskompetencë, duke e kaluar dosjen në Prokurorinë e Elbasanit, ndërsa kjo e fundit, me fillimin e vitit të ri, e ridërgoi edhe një herë te Krimet e Rënda. Ndërkohë, gjatë periudhës së hetimit, Suel Çela ka qenë në masën e sigurisë “Arrest në burg” në mungesë; Enea Bekteshi, së fundi u la në masën e sigurisë “Arrest shtëpie”, ndërsa Kelmend Xhaferraj është hetuar nën masën arrest në burg.
SI NDODHI NGJARJA
Ngjarja ka ndodhur në 18 shtator 2017 në orët e pasdites në lagjen “Syrja Dylgjeri” të Elbasanit, para tregut agro-ushqimor. Efektivët e Policisë së bashku me ish-zëvendës drejtorin Gjergji Oshafi kishin ndaluar mjetin tip “Range Rover”, në të cilin po udhëtonin Klement Xhaferri dhe Ledio Zabeli.
Efektivët kishin parë një radio të dyshimtë në automjet dhe ndaluan dy personat e dyshuar, të cilët nuk iu bindën urdhrit të Policisë. Mjeti ishte nën pronësi të biznesmenit Petrit Çela. Në momentin që do të bëhej shoqërimi i dy personave, në vendngjarje ka ardhur një automjet tip “Audi” i blinduar, që dyshohet se drejtohej nga Suel Çela, djali i biznesmenit Petrit Çela.
Mjeti ka kaluar pranë mjetit të ishzëvendës drejtorit të Policisë, Gjergji Oshafi dhe e ka përplasur këtë të fundit, duke u larguar drejt tregut agroushqimor. Gjatë këtij momenti, ka pasur edhe të shtëna me armë nga ana e efektivëve, të cilët kanë qëlluar në ajër. Policët i kanë dhënë urdhër rojës së tregut, Valmir Dedës, që të hapë portën e tregut, por ai u ka thënë se nuk e kishte pultin. Pas disa minutash, dera është hapur dhe policët kanë hyrë brenda në treg duke arrestuar edhe rojën e tij. Ata kanë gjetur “Audin” e blinduar, i cili rezultoi se ishte nën pronësi po të biznesmenit Petrit Çela. Fillimisht, efektivët e Policisë kanë thënë në dëshmitë e tyre se mjeti erdhi me shpejtësi drejt tyre dhe u rrezikoi jetën.
ARRESTIMI
Policia e Elbasanit fillimisht arrestoi Enea Bekteshin, i cili dyshohet se ka qenë në “Audi-n” e blinduar në ngjarjen e Elbasanit. Mjeti i bluve u godit gjatë operacioneve të kontrollit të Policisë për verifikimin e makinave të luksit më 18 shtator 2017. Ndaj Enea Bekteshit, mësohet se Prokuroria e Krimeve të Rënda, më 29 shtator, ka lëshuar urdhërndalimi, pasi dyshohet të jetë drejtuesi i mjetit tip “Audi” me targa AA 795 EP i dyshuar i blinduar, që goditi mjetin e Policisë me targa MB 002 AA, më datë 18.09.2017 në lagjen “Dyli Haxhire” pranë tregut agro-ushqimor. /panorama
