Lulzim Basha deklaroi për mediat se partia e tij është e vendosur që të luftojë krizën politike në vend.
Sipas kryedemokratit, rruga e vetme për t’u përballur me qeverinë është bashkimi i qytetarëve për t’i dhënë fund kësaj fasade në protestat mbarëpopullore.
“Ditën e djeshme PD ka vendosur që të udhëheq protestat qytetare dhe do të parashtrojë një zgjidhje politike që do ta kemi në Këshillin Kombëtar të PD dhe do kemi një mobilizim të opozitës së bashkuar. Kjo qeveri ka rënë para qytetarëve, para syve të Europës dhe gjithë botës.”, tha Basha pas takimit që zhvilloi me ministrin e Jashtëm holandez, Stef Blok.
Basha shtoi se vendi është zhytur në një krizë te thellë politike.
“Vjen një moment ku Shqipëria po zhytet në një krizë të thellë politike. Ngjarja e djeshme në Kuvend është asgjësimi i të drejtës së fjalës. Ndërkohë situata e përgjithshme mund të bëhet me dy fjalë; kapja e sistemeve dhe institucioneve. Ndaj nuk duhet të fshihen dhe të sheqerosen. Pasi asnjë të re nuk do të kemi nga fronti i perëndimit. Negociatat do të hapen për vendet e tjera dhe jo për Shqipërinë. Unë dhe PD jemi të vendosur që të ndalim krizën politike dhe krizën ekonomike të thellë. Dhe këtë mund ta bëjmë vetëm përmes kthimit te vlerat europiane. Zgjedhje të lira, kontroll i qeverisjes nga qytetarët dhe garë e ndershme politike”, u shpreh Basha.
