Kreu i Autoritetit Rrugor Shqiptar, Afrim Qendro është paraqitur ditën e sotme në Prokurorinë e Tiranës pas zbulimit të skandalit që fshihej pas kompanisë që do ndërtonte lotin e parë të Unazës së Re, ‘DH Albania’, e cila kishte falsifikuar dokumentet për marrjen e tenderit.
Raportohet se Afrim Qendro do të pyetet për tenderin e ‘Unazës së Re’ në cilësinë e personit që ka dijeni. Ai pritet të japë shpjegime në lidhje me tenderin e lotit të parë, pasi Prokuroria ka nisur një hetim me dyshimet se janë falsifikuar dokumentet e kompanisë fituese. Më herët, për këtë çështja janë marrë në pyetje 5 zyrtarë të ARRSH.
ARRSH pezulloi ndërtimin e lotit të parë tek Unaza e Re pasi u zbulua skandali në emisionin "Të Paekspozuarit". Kujotjmë se falë këtij falsifikimi dokumentash kompania Dunwell Haberman fitoi lotin prej 18 milionë euro të tenderit për rindërtimin e Unazës së Madhe, duke krijuar imazhin e rremë se kjo është një kompani 20-vjeçare dhe me eksperincë në projektet e infrastrukturës. E vërteta është se kjo kompani është themeluar në 25 Qershor 2018, vetëm dy muaj përpara zhvillimit të tenderit.
