Kanë vijuar kontrollet prej policisë së Tiranës në të gjithë qarkun në bazë të planit të masave për evidentimin e ushtrimit dhe zhvillimit të kundraligjshëm të lojërave të fatit. 2 subjekte me aktivitet të kundraligjshëm të lojërave të fatit janë zbuluar prej policisë.
Policia lokale ka proceduar penalisht pronarët e tyre, konkretisht:
– A. R., 26 vjeç, banues në Tiranë, për veprën penale “Organizimi i lotarive të palejuara” pasi në rrugën “Todi Shkurti” në subjektin e tij iu gjet një paisje kompjuterike që përdorej për lojëra fati.
– I. A., për veprën penale “Organizim i palejuar i lojërave të fatit”, pasi në rrugën “Konferenca e Pezës” në subjektin e tij u konstatuan 14 shtetas duke luajtur poker.
Në të gjithë qarkun Tiranë, do të vijojnë kontrollet kundër aktivitetit të lojërave të fatit për të ndëshkuar subjektet që zhvillojnë ende aktivitet anti-ligjor. Policia e Shtetit fton këdo të denoncojë falas në numrin 112 ose përmes aplikacionit “Komisariati Dixhital” çdo veprimtari të tillë të kundraligjshme.
