Ambasada e Shteteve të Bashkuara në Athinë u sulmua në orët e para të ditës së sotme nga pjesëtarë të grupimit anarkist “Rubikoni”.
Sulmi u krye në hyrje të parkingut të ambasadës. Anarkistët gjuajtën me tullumbace të mbushura me bojë të kuqe drejt dyerve dhe mureve të ambasadës.
Forcat e sigurisë rreth ambasadës filluan menjëherë ndjekjen dhe arritën të arrestonin tetë persona.
Anarkistët publikuan paraditen e të hënës një komunikatë, ku shpjegojnë se sulmi u krye si reagim ndaj politikës së SHBA-ve në Siri, dhe në rajonin e Ballkanit. Kujtojmë që në vitet 1996 dhe 2007, godina e ambasadës ishte goditur me predha, ku pati vetëm dëme materiale.
