Në vend të gjendjes së tyre të mjerë, rrjepjes që iu bëhet për të çuar paratë e tyre tek oligarkët, kryeministri i vendit u propozonte një të ardhme virtuale.
Kjo është fabula e qeverisjes së tij: në këmbim të mizerjes të tregon kartolinën; në vend të varfërisë, projektet e gratacielave gjigande; në vend të shtëpisë që të prish, maketin shumngjyrësh të rreth rrotullimit tek shqiponja.
Dhe pikërisht këtu, fabula e studentëve që po protestojnë i ngjan asaj të banorëve të unazës së re. Edhe me ata, e njëjta parodi. Në vend të shtëpive që po u prishnin për të fituar plot 20 milionë euro nga tenderi 40 milionësh për 2.2 km rrugë, u tregonin, ashtu si indianëve pasqyrat, projektin dixhital të unazaës.
Zbulimi që bëri të enjtën në mbrëmje emisioni “Të paekspozuarit”, se të gjitha dokumentat e këtij tenderi ishin fallcifikime të letrave të shtetit amerikan (këtë e pranuan edhe organet vendase që e pezulluan atë) me qëllimin për të dërguar paratë e qeveritarëve në parajsa fiskale, e tregon fare qartë se çfarë prezumon kjo propagandë dixhitale.
Ajo do të shesë një realitet virtual, në vend të një vjedhjeje reale.
Ajo është gjithmonë e njëjta, si tek sheshi shqiponja, si tek teatri i Bjorke Ingels, si tek projektet e rilindjes urbane, si tek PPP 1 miliard euroshe dhe si tek kjo e fundit: konviket e reja të qytetit studenti.
Ato vajza të hijshme, që mbanin atë pankartë në duar, treguan me një slogan të vetëm se e kishin kuptuar këtë butafori që mundohet t'i gënjejë shqiptarët prej 5 vitesh. Dhe prandaj ato marshuan sot në rrugë. Jo vetëm dhe thjeshtë se nuk kanë një shtrat komod për të fjetur në konvikt. Jo vetëm dhe thjeshtë se nuk kanë para për një provim të prapambetur. Jo vetëm dhe thjeshtë për të përgjysmuar tarifën e studimit.
Zaptimi i rrugëve të Tiranës dhe protesta që ka marrë përmasa të paimagjinuara, por tregon se ata studentë kanë kuptuar shumë më shumë. Se ata janë të ndërgjegjshëm që hajduti 3D po vjedh të ardhmen e tyre. Po vjedh shkollimin e sotëm, punësimin e nesërm, të ardhmen e lirë, një shoqëri me shance të njëjta dhe me mundësi të barabarta.
Mjafton të dëgjosh himnin e protestës së tyre, ku demaskohen ato që quhen pallavra qeverie të ardhura nga njerëz të zhytur në luks dhe me makina të shtrenjta. Mjafton të kuptosh antitezën që ata bëjnë mes këtyre pallavrave dixhitale dhe jetës së tyre të lënë "në varfëri, pa punë, pa dije, pa rini"!
Nuk ka më dyshim se ata e kanë kuptuar se nga u vjen e keqja. Dhe këtë nuk ka më talent dixhital që ta fshehë.
©Lapsi.al
Lexo më tej:
Mos e humbni/ Manifesti i kërkesave antiqeveritare të studenteve ( në vargje)
Andi Bushati: Kryeministri i të pasurve po përballet me revoltën e të varfërve
