Të gjithë fansat e Flori Mumajesit u surprizuan tejmase këtë të mërkurë, pasi kantautori i njohur, pas një heshtjeje të gjatë, publikoi më në fund projektin e tij të ri muzikor: bashkëpunimin me Brunon, të titulluar “Ia ke bo vetes”.
Ky ishte padyshim një hap i papritur nga artisti, të cilin të gjithë e prisinin të dielën e shkuar të prezantonte këngën konkurruese në festivalin “Kënga Magjike”.
Mirëpo, Mumajesi nuk u shfaq përkrah këngëtarëve të tjerë konkurrentë, duke ngritur dyshime të shumta se ai mund të kishte ndërruar mendje, duke hequr dorë nga gara në moment të fundit dhe duke zgjedhur më mirë të publikojë një këngë me Brunon e cila deri më tani ka rezultuar mjaft e suksesshme. Por duket se gjërat nuk janë aspak kështu.
“Iconstyle.al” ka mësuar ekskluzivisht se kantautori i famshëm do të jetë pjesë e festivalit “Kënga Magjike” dhe se po vijon punën me produksionin që pritet ta prezantojë këtë të diel.
Pra, Flori ka vendosur të rikthehet fuqishëm në tregun muzikor, pas një pauze të shkurtër. Sakaq, pak është mësuar se “Kënga Magjike”, do të mbahet në datat 5 dhe 6 dhjetor, ndërkohë që finalja e madhe do të mbahet me datë 8 dhjetor.
Kujtojmë se ky vit shënon një edicion të rëndësishëm për festivalin e vetëm të muzikës moderne shqiptare, pasi mbush plot 20 vite nga edicioni i tij i parë.
