E dashura e XXXTentacion ishte shtatzënë kur reperi ndërroi jetë pas një atentati me armë në Florida në muajin qershor.
Pak muaj pas vrasjes së tij, familjarët i kanë organizuar një baby shower foshnjës që pritet të lindë shumë shpejt. Madje nëna e reperit ka zbuluar emrin e fëmijës, i cili do të quhet Gekyume.
“Emri i tij është Gekyume”, shkruan ajo në postimin e saj në Instagram.
Sipas Urban Dictionary, fjala “Gekyume” u krijua nga XXXTentacion para se të ndërronte jetë.
Ai kishte si qëllim të përshkruante një lloj tjetër gjendjeje ose një univers tjetër mendimesh. Përkufizimi i fjalës vjen nga vetë reperi i cili e përmendi për herë të parë atë në një nga videot e shumta live në Instagram.
Miku i tij DJ Scheme ishte i pranishëm në festën që u organizua për foshnjën dhe madje publikoi edhe një foto, përmes së cilës premtonte se do të bëhet xhaxhai më i mirë për fëmijën e XXXTentacion.
Kujtojmë që ylli i muzikës, emri i të cilit është Jahseh Dwayne Onfroy, u vra në qershor pasi dy meshkuj të maskuar e qëlluan atë ndërsa ishte ulur në makinën e tij, në Florida. Është e paqartë se kush është nëna e fëmijës, por burimet thonë për “TMZ” se nuk është ish-e dashura e tij Geneva, për të cilën reperi u akuzua se e kishte dhunuar.
