“Becoming” përmbys “Living History”.
Libri i ish-zonjës së parë të Shteteve të Bashkuara të Amerikës, Michelle Obama ka shënuar rekord shitjesh që në javën e parë të publikimit. “Becoming” ka shitur 1.4 milionë kopje që në javën e parë, kështu tha “Crown Publishing” për “Associated Press”. Libri flet për jetën e Michelle, rrugëtimin e saj që nga fëmijëria kur jetonte në pjesën jugore të Chicago-s, deri te posti i saj në Shtëpinë e Bardhë, kur u bë zonja e parë e Amerikës.
Vetëm në ditën e parë u shitën mbi 725 mijë kopje të librit. Ky rekord bëri që libri i gruas të ish-presidentit, Barack Obama të rrëzojë nga froni librin e Hillary Clinton, “Living History”, në vitin 2003, i cili sipas “Associated Press”, ka shitur 600 mijë kopje në ditën e parë.
Në këtë libër flitet për shumë raste dhe situata të vështira, të cilat ajo i ka kaluar si problemet martesore dhe terapia në çift, që e ndihmoi atë si ta ndërtojë jetën e saj, një abort të vështirë që ka përjetuar, mendimet e saj lidhur me presidentin aktual të ShBA-së, Donald Trump e shumë të tjera.
