Kampionia Olimpike e Kosovës, Majlinda Kelmendi, nuk zhgënjen pritshmëritë dhe në peshën 52 kg, fiton medaljen e artë në garën Grand Prix në Tashkent të Uzbekistanit. Xhudistja kosovare dominoi në finale në përballje me zviceranen Evelyne Tschopp, por praktikisht ishte një ndeshje që "e arta" e Kosovës e dinte se do ta fitonte.
Në dy vitet e fundit, fati e kishte sjellë gjithnjë zviceranen Evelyne Tschopp përballë Majlinda Kelmendit, por bëri gjithashtu që në finalen e Uzbekistanit kosovarja të kishte me tëpër besim tek vetja. Vetëm 25 sekonda iu deshën xhudistes nga Kosova për të mundur Tschopp në 7 gushtin e vitit 2016.
Pak më e vështirë, por gjithësesi me të njëjtin përfundim ishte edhe gara e një viti më pas: 29 gusht 2017, kur në raundin e dytë Kelmendi, në kategorinë deri në 52 kilogram, mposhti përsëri zviceranen Tschopp.
Pas medaljes së argjendtë në Grand Slam në Abu Dhabi, tani Kelmendi rrëmbeu të artën, duke triumfon me "ippon", apo një minutë e 52 sekonda para kohe. Kosovarja ka marrë gjithashtu 700 pikë në kategorinë 52 kg, që janë tepër të rëndësishme për të marrë pjesë në Lojërat Olimpike në Tokio të vitit 2020.
Majlinda Kelmendi fillimisht eliminoi Madelene Rubinstein nga Norvegjia, pastaj në çerekfinale ka qenë superiore ndaj hungarezes Reka Pupp dhe në gjysmëfinale shtriu me shpatulla në tokë Ana Box Perez të Spanjës.
